2018-ci il oktyabrın 19-da İsmayıllı rayonunda fəaliyyət göstərən “Niyal” Təhsil mərkəzinin və Bakı şəhərində fəaliyyət göstərən “Unikal” Təhsil mərkəzinin 10-cu və 11-ci sinif şagirdləri ilə Xəzər Universitetində tanışlıq xarakterli görüş keçirildi. Tədbiri giriş sözü ilə İctimai Əlaqələr və Media üzrə direktor Əlövsət Əmirbəyli açaraq, sözü Xəzər Universitetinin rektoru Dr.Hassan Niknafsa verdi və rektor abituriyentləri salamladı.

Daha sonra Humanitar və Sosial Elmlər fakültəsi Psixologiya departamentinin müəllimi Nilufər Əlizadə abituriyentlərə kiçik psixoloji seminar keçirərək, qəbul imtahanları öncəsi streslə necə mübarizə aparmağın yolları haqqında məlumat verdi.

Bundan sonra Xəzər Universiteti haqqında film nümayiş etdirildi. Ardınca, professor Fuat Rəsulov təqdimatla çıxış edərək, Xəzər Universitetinin məzunlarının uğurları haqqında, universitetin xüsusiyyətləri və üstünlükləri barəsində və s. geniş məlumat verdi.

Yekunda universitetin fakültə nümayəndələri abituriyentlərə tədris olunan ixtisaslar haqqında məlumat verdilər. Abituriyentlər universitetin bəzi laboratoriyaları və kitabxanası ilə tanış oldular.

Sonra İsmayıllıdan gələn abituriyentlər üçün şəhərdə gəzinti təşkil olundu.