2018-ci il oktyabrın 12-də Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı Azərbaycan Robotiks və Mühəndislik Akademiyasının direktoru Rəhman Rəsulzadə və Xəzər Universitetinin robotiks üzrə komandası “Killshot” ilə görüşdü.

Görüş zamanı Professor İsaxanlı Azərbaycan II Robot Olimpiadasında qalib olmuş Xəzər Universitetinin Mühəndislik və Tətbiqi Elmlər fakültəsinin Kompüter mühəndisliyi ixtisasının tələbələrindən ibarət (Məhəmməd Məmmədli, Vüsal İsmayılov, Rauf Hacıyev) “Killshot” komandasının yarışlara hazırlıq prosesini müzakirə etdi, onlara öz məsləhətlərini verdi və gələcək Dünya Robotiks Olimpiadasında uğurlar arzuladı.

Qeyd edək ki, 2018-ci il oktyabrın 6-da Əl Oyunları Sarayında 20 təhsil müəssisəsindən 54 komandanın iştirakı ilə 4 kateqoriya üzrə Azərbaycan II Robot Olimpiadası keçirilmişdi. Qaydalara əsasən bu yarışlarda qalib gələn komanda Azərbaycanı Tailandda keçiriləcək Dünya Robot Olimpiadasında təmsil etməyə haqq qazanır.