2018-ci il sentyabrın 14-də Sumqayıt “Dünya” məktəbində yeni dərs ilinin açılışı münasibətilə tədbir keçirildi. Məktəb rəhbərliyi, şagird, müəllim, valideyn kollektivinin birgə iştirakı ilə keçirilən tədbir Xəzər Universitetinin tələbələri və “Dünya” məktəbinin şagirdlərindən ibarət rəqs qrupunun təntənəli çıxışları ilə bəzəndi.

Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı bu günü təhsilin bayramı adlandıraraq, təhsil günü münasibətilə hamını təbrik etdi. Professor İsaxanlı qloballaşan dünyada öz xalqının musiqisini, ədəbiyyatını, mədəniyyətini gözəl bilməklə yanaşı, həm də dünyanı yaxşı başa düşən, insanların bərabər olduğunu dərk edən şagirdlərin yetişdirilməsinin zəruri olduğunu vurğuladı. Hamlet İsaxanlı bunun üçün beynəlxalq təhsil proqramlarının tərtib olunmasının və beynəlxalq dillərə üz tutmağın vacibliyini qeyd etdi.

O, Sumqayıtın Azərbaycanın üç böyük şəhərindən biri olduğunu bildirək, Sumqayıt “Dünya” məktəbində ən güclü pedaqoqların toplaşdığını və məktəbdə şagirdlərin daha yaxşı təhsil almaları üçün hər cür şərait yaradıldığını və bu şəraitin daha da genişləndiriləcəyini dedi.

Əllərində gül dəstələri ilə məktəbə ilk qədəmlərini qoyan birincilər, valideynlər xüsusi maraq və həvəslə məktəblə daha yaxından tanış oldular.