2018-ci il sentyabrın 13-də “Dünya” məktəbində 1-ci siniflərin “Məktəbdə ilk günüm” adlı açılış tədbiri keçirildi. Məktəb rəhbərliyi, müəllimlər, 1-ci sinfə ilk qədəmlərini qoyan balacalar və onların valideynlərinin iştirakı ilə keçirilən bayram tədbirində sevinc, təntənə, kövrək duyğular, gözəl musiqilər və rəqslər bir-birinə qovuşdu. Öncə məktəb haqqında film nümayiş etdirildi.

Daha sonra Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı çıxış edərək, hər bir uşağın gələcəyində, onun inkişafı və zövqünün formalaşmasında təhsil aldığı məktəbin xüsusi əhəmiyyət kəsb etdiyini vurğuladı. H.İsaxanlı “Dünya” məktəbinin Xəzər Universitetinin nəzdində fəaliyyət göstərdiyini, məktəbin 3 – Azərbaycan, ingilis, rus bölmələrindən ibarət olması onun üstün, mütərəqqi cəhətlərindən biri olduğunu bildirdi.

Professor Hamlet İsaxanlı 1-ci sinfə başlayan balacaları və valideynləri təbrik edərək, “Dünya” məktəbinin bir tərəfdən dünya vətəndaşı, digər tərəfdən dünyanı başa düşən hərtərəfli Azərbaycan vətəndaşı yetişdirdiyini qeyd etdi.