Xəzər Universitetinin vebsaytında və sosial şəbəkələrdə abituriyentlər və valideynlər üçün elan edildiyi kimi, 2018-ci il iyulun 31-də universitetin Neftçilər kampusunun Mərmər salonunda Açıq Qapı Günləri başlandı. Açıq Qapı Günlərini keçirməkdən məqsəd Dövlət İmtahan Mərkəzinin iyulun 30-dan avqustun 13-dək elan etdiyi ali təhsil müəssisəsi və ixtisas seçimi prosesində abituriyentlərə əsaslı yardım göstərməkdən ibarətdir.

Dünəndən etibarən Mərmər salonda universitetin dekan və departament müdirləri, əməkdaşlar abituriyent və valideynləri qəbul edərək, Azərbaycanın ali təhsil müəssisələri arasında Xəzər Universitetin yüksək reytinqi, təhsil şəraiti, ixtisaslar, təhsil haqqındakı güzəştlər, maddi baza və s. haqqında onlara geniş məlumat verirlər, suallarını ətraflı cavablandırırlar. Abituriyentlər universitet əməkdaşları ilə görüşdən məmnun qaldıqlarını və bunun universitet və ixtisas seçimində onlara istiqamət verəcəyini bildirirlər.

Açıq Qapı Günləri avqustun 13-dək davam edəcək.