2018-ci il iyulun 20-də Xəzər Universitetinin Mərkəz kampusunda Azərbaycan Təhsil Şurasının təşkilatçılığı ilə görkəmli pedaqoq, əməkdar müəllim, Prezident təqaüdçüsü professor Əjdər Ağayevin həyat və yaradıcılığından bəhs edən “Müəllimlər müəllimi” sənədli filminin təqdimatı keçirildi. Təqdimatda Xəzər Universitetindən İnkişaf mərkəzinin layihə meneceri Ülkər Bayramova və “Xəzər Xəbər” jurnalının baş redaktor müavini, əməkdar jurnalıst Əlirza Balayev iştirak etdilər.
Filmin nümayişindən sonra ölkənin tanınmış alimləri, pedaqoqları və təhsil ictimaiyyəti nümayəndələrinin iştirakı ilə geniş müzakirəsi keçirildi. Filmin ssenari müəllifi və quruluşçu rejissoru Əlinasir İmanlı çıxış edərək, filmin hazırlanması prosesindən danışdı. Lənkəran Dövlət Universitetinin dissertantı Ülkər Bayramova öz elmi rəhbəri Əjdər Ağayevin gənc tədqiqatçılara göstərdiyi böyük qayğıdan söhbət açdı.
Sonda yazıçı-publisist Sahib Sailov çıxış edərək, filmin yaradıcı heyətinə və iştirakçılara təşəkkürünü bildirdi.