“Ədəbiyyat qəzeti” və “525-ci qəzet”in 14 iyul tarixli nömrələrində Azərbaycan Milli Elmlər Akademiyasının vitse-prezidenti, Milli Məclisin Elm və təhsil komitəsinin sədri, akademik İsa Həbibbəylinin “Qoşa qanadların harmoniyası” adlı məqaləsi dərc olunmuşdur. Elmi idrakla bədii yaradıcılığın sintezi məsələlərinə həsr etdiyi məqaləsində İ.Həbibbəyli görkəmli riyaziyatçı alim olmaqla yanaşı humanitar elm sahələrində də çoxlu əsərlərin müəllifi olan professor Hamlet İsaxanlının yeni - “Əlkimya: elm, sənət və mistika” adlı kitabından da bəhs edərək yazmışdır:

“Fizika-riyaziyyat elmləri doktoru, professor Hamlet İsaxanlının 2018-ci ildə nəşr etdirdiyi “Əlkimya: elm, sənət və mistika” kitabı elmi idrakla bədii düşüncənin sintezi və vəhdəti problemlərinə həsr olunmuş mühüm elmi əhəmiyyətə malik ciddi monoqrafik tədqiqatdır. Bu, - dünya miqyasında geniş mənada ədəbiyyatdan elmə, konkret mənada isə bədii yaradıcılıqdan əlkimya və əlfizikaya, yaxud da əksinə olan elmi-ədəbi prosesləri dərindən araşdırıb ümumiləşmiş şəkildə təqdim edən sanballı tədqiqat əsəridir. Bu, - Azərbaycan elminin bədii təxəyyüllə elmi idrakın qarşılıqlı əlaqələrinin nəzəriyyəsi və təcrübəsinə qiymətli töhfəsidir.”