2018-ci il mayın 21-dən 24-dək Xəzər Universitetinin Riyaziyyat departamentinin təşkilatçılığı, Azərbaycan, Rusiya, Gürcüstan, Türkiyə, Ukrayna, ABŞ, İsveç və Birləşmiş Ərəb Əmirliklərinin nümayəndələrindən ibarət Beynəlxalq Təşkilat Komitəsinin rəhbərliyi ilə universitetin təsisçisi, Direktorlar və Qəyyumlar Şurasının sədri professor Hamlet İsaxanlının (İsayev) 70 illik yubileyinə həsr olunmuş “Riyazi fizikanın operatorları, funksiyaları və sistemləri” mövzusunda keçirilmiş beynəlxalq konfransın iştirakçılarından riyaziyyat üzrə elmlər doktoru, Koç Universitetinin professoru Varqa Kələntərov H.İsaxanlıya təşəkkür məktubu göndərmişdir. Məktubda deyilir: “Konfrans bitdikdən bir gün sonra İstanbula döndüm. Bu günlər hələ konfransın təsiri altındayam. Gördüklərim, eşitdiklərim və öyrəndiklərim haqqında yaxınlarım və yoldaşlarımla paylaşıram. İstanbulda və Ankarada differensial tənliklər ilə əlaqəli çox daha kiçik bir neçə toplantının təşkilində mən də iştirak etmişəm. A.Aleksandrov, A.Belavin, M. Belishev, A. Helemski , B. Mtyagin, G.Rosenblyum kimi məşur alimlərin və bir sıra parlaq gənclərin iştirakı ilə konfransın təşkil edilməsinin nə qədər çətin olduğunu təxmin edirəm. Dünya səviyyəsində belə bir toplantıya dəvət edildiyim üçün təkrar çox təşəkkür edirəm”.