2018-ci il mayın 30-da İsmayıllıda yerləşən Niyal Hazırlıq kurslarının X və XI sinif şagirdləri Xəzər Universitetində oldular. Öncə toplantı salonunda universitet rəhbərliyi ilə şagirdlərin və onların müəllimlərinin görüşü oldu. Görüşü İctimai əlaqələr və media üzrə direktor Əlövsət Əmirbəyli açaraq, salondakıları salamladı və universitetin İsmayıllının Niyal hazırlıq Mərkəzi ilə olan əlaqələrindən danışdı. Universitetin Akademik İşlər üzrə prorektoru Məhəmməd Nuriyev, Humanitar və sosial elmlər fakültəsinin dekanı Cabir Xəlilov, İqtisadiyyat və menecment fakültəsinin dekanı Ceyhun Məmmədov, Mühəndislik və tətbiqi elmlər fakültəsinin dekan müavini Fəxrəndə Əlimərdanova, İngilis dili departamentinin koordinatoru Milana Abbasova, Psixologiya departamentinin koordinatoru Mələk Kərimova və digər əməkdaşlar Xəzər Universitetinin ixtisasları haqqında geniş məlumat verdilər. Sonra İsmayıllıdan gələn qonaqlar professor Fuat Rəsulovun rəhbərliyi altında Xəzər Universitetindəki laboratoriyalar, sinif otaqları, kitabxanalar, institutlarla tanış oldular, universitetin şəhər mərkəzindəki (Bəşir Səfəroğlu küç.122) kampusunu və “Dünya” məktəbini ziyarət etdilər. Qonaqlar günorta yeməyindən sonra Bakı şəhərinin görməli yerləri ilə tanış oldular.

Xatirə şəkilləri çəkildikdən sonra müəllim və tələbələr Xəzər Universitetinə məxsus avtobusla yenidən İsmayıllıya yola düşdülər.

Xəzər Universitetinin bu təşəbbüsündən sonra Niyal Hazırlıq kurslarının rəhbəri Həsən Rəhimov universitetə təşəkkür məktubu göndərmişdir.