2018-ci il mayın 29-da Xəzər Universitetində Karyera Mərkəzinin təşəbbüsü ilə ənənəvi olaraq hər il keçirilən Karyera Sərgisi baş tutdu. Karyera sərgisinin keçirilməsinin əsas məqsədi tələbə və məzunların iş həyatına inteqrasiya prosesini dəstəkləyərək, onları mövcud bazarın aparıcı şirkətləri ilə tanış etməkdir. Tədbir “Baker Tilly” şirkətinin xüsusi dəstəyi ilə həyata keçirildi. Sərgidə Amerika səfirliyi də daxil olmaqla, 24 şirkətin nümayəndələri iştirak edirdilər.

Xəzər Universitetinin Tədris işləri üzrə prorektoru professor Məmməd Nuriyev çıxış edərək, Karyera Sərgisini açıq elan etdi. O, öz çıxışında sponsorluğa görə “Baker Tilly” şirkətinə və digər iştirakçı şirkətlərə təşəkkür etdi.

Tələbələrin marağını nəzərə alaraq, tədbir iki hissədən ibarət təşkil olundu. Tədbirə Xəzər Universitetinin tələbələri, məzunları, həmçinin, digər universitetlərin iştirakçıları qatıldı. Onlar şirkət nümayəndələrinə öz CV-lərini təqdim edərək, mövcud vakansiyalarla tanış olmaq şansı əldə etdilər. İştirak edən tələbələrə Karyera Mərkəzi tərəfindən tədbirin promo materialları təqdim edildi.

Sonda Karyera Mərkəzinin meneceri Səbinə Allahverənova tədbirdə iştirak edənlərə öz təşəkkürünü bildirdi.