2018-ci il mayın 25-də universitetin Mərmər salonunda Humanitar və sosial elmlər fakültəsi və Psixologiya departamentinin təşkilatçılığı ilə universitetin təsisçisi, Direktorlar və Qəyyumlar Şurasının sədri professor Hamlet İsaxanlının 70 illik yubileyinə həsr olunmuş  “Hamlet İsaxanlının poeziyasına psixoloji səyahət” adlı tədbir keçirildi. Tədbirdə universitetin rəhbərliyi və əməkdaşları, tələbələr, tanınmış elm və incəsənət xadimləri iştirak edirdilər.

Tədbiri Psixologiya departamentinin müəllimi Nilufər Əlizadə açaraq, H.İsaxanlının poetik yaradıcılığının yeni rakursdan şərhi baxımından tədbirin özünəməxsusluğunu qeyd etdi. Sonra H.İsaxanlının həyat və fəaliyyətini əks etdirən videoçarx nümayiş olundu.

İngilis dili və ədəbiyyatı departamentinin baş müəllimi Firəngiz Nəsirova H.İsaxanlının şeirlərini ingilis dilinə tərcümə etmək təcrübəsindən danışdı və “Yaşamağa nə var ki?” şeirindən bəhs etdi. Humanitar və sosial elmlər fakültəsinin Psixologiya departamentinin koordinatoru, universitetin Psixoloji Xidmət Mərkəzinin direktoru Mələk Kərimova, Psixologiya departamentinin müəllimləri Nilufər Əlizadə və Fərəh Adıgözəlova H.İsaxanlının şeirlərini psixoloji cəhətdən analiz etdilər, Azərbaycan dili və ədəbiyyatı departamentinin müəllimi Dilbər Zeynalova, Fəlsəfə departamentinin müəllimi Mail Yaqub şairin şeirləri haqqında fikirlərini bildirdilər.

Şair, Əməkdar incəsənət xadimi Baba Vəziroğlu, Xalq yazıçısı Mövlud Süleymanlı öz çıxışlarında H.İsaxanlının görkəmli riyaziyyatçı alim olması ilə yanaşı çoxşaxəli fəaliyyətindən danışdılar, şair və tərcüməçi kimi, humanitar elm sahələrinin tədqiqatçısı kimi yaradıcılığından bəhs etdilər.

Nilufər Əlizadə H.İsaxanlının həyat yoldaşı Nailəxanım İsayeva ilə birlikdə çəkilmiş portretini ona hədiyyə verdi.

Tədbir musiqi proqramı ilə müşayiət olunurdu. Universitetin Musiqi və incəsənət departamentinin müdiri, əməkdar müəllim, pianoçu Zülfiyyə Sadıqovanın başçılıq etdiyi universitetin Kamera orkestrinin müşayiəti ilə Azərbaycan Dövlət Musiqili Teatrının solisti, beynəlxalq müsabiqələr laureatı Atəş Qarayev, Müslüm Maqomayev adına Dövlət Akademik Filarmoniyasının solisti, Xəzər Universitetinin müəllimi Məhsəti Çabbarova H.İsaxanlının sözlərinə Nailəxanım İsayeva, Əməkdar artist Elza Seyidcahan və Dilarə Qulamovanın bəstələdikləri mahnıları ifa etdilər.

Sonda professor Hamlet İsaxanlı çıxış edərək, tədbirin təşkilatçılarına və iştirakçılara təşəkkürünü bildirdi.