2018-ci il mayın 18-də Xəzər Universitetinin İqtisadiyyat və menecment fakültəsinin tələbələrindən ibarət THE SAME AzTV kanalında yayımlanan “MAG”(Müasir Azərbaycan Gənci) proqramında çıxış etdilər. Qeyd edək ki, MAG televiziya proqramı Azərbaycan gənclərinin fəaliyyət və uğurlarını işıqlandıran gənclər arasında ən baxımlı verilişlərdən biridir.

Çıxışında komanda öz gördüyü işlərdən və gələcək planlarından danışdı. Eləcə də, Peer to Peer: Facebook Qlobal Rəqəmsal Çağırış müsabiqəsinin gənclərə verdiyi töhfələrdən söhbət açıldı. Əsas məqsədi irqçi onlayn nifrət nitqlərinə qarşı təşkilat yaratmaq olan komanda sosial media hesablarının necə idarə edilməsi, hansı yollardan istifadə edərək, daha çox kütlənin cəlb edilməsi və ideyalarının gənclər tərəfindən yüksək qiymətləndirilməsi haqda danışdı.

İlk olaraq, komandanın lideri Dr. Bahadır Baysal komandanın necə ərsəyə gəldiyini, komanda üzvlərinin hansı bacarıqlara sahib olaraq, digər tələbələrdən seçildiklərini və komanda üzvlərinin marketinq və digər ixtisas yönümlü bacarıqlarının onlara nə dərəcədə bu müsabiqədə kömək olduğunu qeyd etdi. Sonra komandanın üzvü Xəyalə Şıxəliyeva THE SAME-in mahiyyəti və əsas məqsədləri barəsində çıxış etdi və komandanın keçirdiyi ilk sorğunun onların qərarlarına necə təsir etdiyini qeyd etdi. Daha sonra komandanın üzvü Ruslan Osmanlı EdVenture Partners şirkətinin Peer to Peer: Facebook Qlobal Rəqəmsal Çağırış müsabiqəsi barəsində və bu müsabiqəyə necə qoşulmaq barəsində məlumat verdi. Komandanın digər üzvləri Sinan Rzayev və Etibar Saatov isə THE SAME komandasının sosial media strategiyası, keçirdikləri və gələcəkdə gözlənilən layihələri haqqında danışdılar.