2018-ci il mayın 21-də Xəzər Universitetinin Riyaziyyat departamentinin təşkilatçılığı, Beynəlxalq Təşkilat Komitəsinin rəhbərliyi ilə universitetin Mərmər salonunda universitetin təsisçisi, Direktorlar və Qəyyumlar Şurasının sədri professor Hamlet İsaxanlının (İsayev) 70 illik yubileyinə həsr olunmuş “Riyazi fizikanın operatorları, funksiyaları və sistemləri” (RFOFS) mövzusunda beynəlxalq konfrans işə başladı. Konfransın məqsədi riyazi fizika sahəsində yeni nəticələri və tədqiqat istiqamətlərini müzakirə etməkdir.

Konfransda Xəzər Universitetinin rəhbərliyi və əməkdaşları, Azərbaycan, Türkiyə, İran, Rusiya, Gürcüstan, Ukrayna, Qazaxıstan, Almaniya, Fransa, İspaniya, Səudiyyə Ərəbistanı Krallığı, Avstriya, ABŞ, İtaliya, İngiltərə, Birləşmiş Ərəb Əmirlikləri və İsveçdən olan riyazi fizika sahəsində 70-ə yaxın görkəmli alim, aparıcı mütəxəssis və gənc tədqiqatçılar iştirak edirlər.

Konfrans aşağıdakı mövzuları əhatə edir: Ümumi operatorlar və spektral nəzəriyyə; Riyazi fizikanın xüsusi törəməli tənliklərinin analizi; Diferensial operatorların spektral nəzəriyyəsi; Riyazi fizikanın məsələlərində bazislər, freimlər və aproksimantlar; Klassik və kvant inteqrallanan modellər; Sim və kvant sahə nəzəriyyəsi; Xüsusi funksiyalar; Səpilmə nəzəriyyəsi; Tərs məsələlər.

Konfransı giriş sözü ilə Xəzər Universitetinin rektoru Dr. Hassan Niknafs açaraq, iştirakçıları salamladı, tədbirin beynəlxalq əhəmiyyətindən danışdı və konfrans iştirakçıları adından professor Hamlet İsaxanlını 70 illik yubileyi münasibətilə təbrik etdi.

Professor Hamlet İsaxanlı geniş çıxışında riyazi fizika sahəsində dünyada əldə olunan yeni nəticələrin və tədqiqat istiqamətlərinin müzakirə edilməsini, sahənin aparıcı mütəxəssislərinin Bakıda, Xəzər Universitetində bir araya gəlməsini əlamətdar hadisə adlandırdı və buna görə iştirakçılara təşəkkürünü bidirdi, konfransa uğurlu iş arzuladı.

Sonra konfransın proqramına uyğun olaraq məruzələrin dinlənilməsinə başlanıldı.

Konfrans 4 gün ərzində 4 bölmədə işini davam etdirəcək.

Konfransın bağlanış mərasimi mayın 24-də keçiriləcək.