2018-ci il mayın 5-də 2018-ci ildə Xəzər Universitetinin Tələbələrin cəlb olunması üzrə işçi qrupun rəhbəri professor Fuat Rəsulov, İctimai əlaqələr və media üzrə direktor Əlövsət Əmirbəyli və Psixologiya departamentinin koordinatoru, Xəzər Psixoloji Xidmət Mərkəzinin direktoru Mələk Kərimova İsmayıllı şəhərində fəaliyyət göstərən Niyal Hazırlıq Kurslarının Xəzər Universiteti ilə birgə təşkil etdiyi “Peşə seçimi və gələcəyim” adlı seminarda iştirak etmək məqsədilə adıçəkilən rayona səfər etdilər.

Tədbir İsmayıllı rayonunun Uşaq-Gənçlər İnkişaf Mərkəzində təskil edilmişdi. Görüşü Niyal Hazırlıq Kurslarının müdiri Həsən Məmmədov açdı. O, qonaqları salamladı, hazırlıq kursları barəsində qısa məlumat verdi və sonra sözü Xəzər Universitetinin nümayəndəsi Əlövsət Əmirbəyliyə verdi.

Ə.Əmirbəyli Xəzər Universiteti və ixtisaslar barədə məlumat verdi, seminara gələn iştirakçılara öz təşəkkürünü bildirdi. Sonra isə sözü Mələk Kərimovaya verdi. M.Kərimova abituriyentlərə qəbul imtahanından əvvəl yaşaya biləcəkləri həyəcan zamanı nələr edə biləcəkləri haqqında məlumat verməklə yanaşı, peşə seçimində qərarsızlıq yaşayanlara da məsləhətlər verdi.

Seminar interaktiv şəkildə keçdi, mövzu ilə bağlı müzakirələr aparıldı və suallar cavablandırıldı.

Yekunda professor Fuad Rəsulov iştirakçılara peşə seçimi ilə yanaşı, seçilən universitetin də önəmli olduğunu qeyd etdi və Xəzər Universiteti ilə bağlı video çarx nümayiş etdirdi. Sonra Xəzər Universitetinin məzunlarının uğurlarını nümayiş etdirərək, universitetin üstünlüklərini, güzəştli qəbul şərtlərini və s. məsələləri açıqladı.

Tədbirdə Xəzər Universitetinin İqtisadiyyat və menecment fakultəsinin üçüncü kurs tələbəsi Toğrul Nəbiyev də çıxış edərək, universitetdəki təlim və tədris mühiti haqqında, tələbələr üçün yaradılmış əlverişli şərait haqqında danışdı.

Tədbiri İsmayillı rayon təhsil idarəsinin metodisti Rəşid Məmmədov yekunlaşdırdı və qonaqlara dərin minnətdarlığını bildirdi. O, Xəzər Universitetinin müəllimlərinin İsmayıllı rayonuna gələrək, məktəblilərlə canlı ünsiyyət qurmasını yaddaqalan bir hadisə kimi dəyərləndirdi.

Tədbirin sonunda iştirakçılara Nihal Hazırlıq Kurslarının rəhbəri ilə birgə imzalanmış Xəzər universitetinin sertifikatları təqdim edildi, bloknot və qələmlər hədiyyə olundu.

Sonra qonaqlar iştirakçılarla bərabər xatirə şəkli çəkdirdilər.