2018-ci il mayın 3-dən 5-dək Türkiyənin 26-cı Baş Qərargah rəisi (Genelkurmay Başqanı) orgeneral İlker Başbuğ Azərbaycan Xalq Cümhuriyyətinin və Milli Ordunun qurulmasının 100 illiyi münasibətilə Xəzər Universitetinin dəvəti ilə universitetin qonağı oldu.

Mayın 3-də orgeneral Başbuğ “Dünya” məktəbinin konfrans zalında tələbələrə “Milli siyasət: Türkiyə-Azərbaycan qardaşlığı” mövzusunda mühazirə oxudu. Həmin gün İlker Başbuğ Xəzər Universtetinin rəhbərliyi və əməkdaşları ilə birlikdə İçərişəhəri gəzdi, Şirvanşahlar saray kompleksində oldu.

Mayın 4-də orgeneral İlkər Başbuğ Xəzər Universitetinin kollektivi ilə birlikdə Fəxri Xiyabanda Ümummilli Lider Heydər Əliyevin və Azərbaycan Respublikasının ikinci prezidenti Əbülfəz Elçibəyin məzarlarını ziyarət edərək, əklil qoydu. Görkəmli oftalmoloq alim Zərifə Əliyevanın xatirəsi də yad edildi. Sonra İlker Başbuğ Xəzər Universitetinin kollektivi ilə Şəhidlər Xiyabanına gedərək, şəhidlərin xatirəsinə ucaldılmış abidə önünə əklil qoydu. Burada İlkər Başbuğa 20 Yanvar faciəsi barədə ətraflı məlumat verildi. 1918-ci ildə Bakını bolşevik-daşnak qüvvələrinin işğalından azad edən Qafqaz İslam Ordusunun şəhidlərinin uyuduğu “Türk şəhidliyi”də ziyarət edilərək, əklil qoyuldu və xatirə şəkilləri çəkildi.

Həmin gün Xəzər Universitetinin “Neftçilər” kampusunda “Elm və Sənət Məclsi”nin 67-ci görüşündə İlkər Başbuğ “Yaxın Şərq və Türkiyə” mövzusunda çıxış etdi, çoxsaylı sualları cavablandırdı. Həm “Dünya” məktəbində, həm də Xəzər Universitetində keçirilən tədbirlərdə Xəzər universitetinin təsisçisi, Direktorlar və Qəyyumlar Şurasının sədri professor Hamlet İsaxanlı çıxış edərək, Türkiyə və Azərbaycanın qardaşlıq əlaqələrindən, Xəzər Universiteti ilə Türkiyənin bir sıra universitetləri arasında geniş işgüzar əməkdaşlığın yaranmasından və inkişaf etdirilməsindən danışdı. Professor Hamlet İsaxanlı İlker Başbuğa Xəzər Universiteti adından hədiyyə təqdim etdi.

Xəzər Universitetində təşkil olunmuş hər iki tədbir özəl və dövlət televiziyaları tərəfindən işıqlandırıldı.

Mayın 5-də İlkər Başbuğ Miniatür Kitab Muzeyində oldu, muzeyin təsisçisi və direktoru Zərifə Salahovanın xahişi ilə rəy dəftərinə ürək sözlərini yazdı.

Orgeneral İlkər Başbuğu tədbirlərdə Xəzər Universiteti Təhsil fakültəsinin dekanı dosent Elza Səmədova və Türkiyə Böyükelçiliyinin nümayəndələri müşayiət etmişlər.

Qeyd edək ki, Orgeneral İlker Başbuğ “Terör Örgütlerinin Sonu” (2011), “20.Yüzyılın En Büyük Lideri Atatürk” (2012), “Suçlamalara Karşı Gerçekler” (2013), “Nasıl Bir Türkiye” (2015), “Ermeni Suçlamaları ve Gerçekler” (2015), “Unutulan Ada Kıbrıs” (2016), “15 Temmuz Öncesi ve Sonrası” (2016), “Sorunlarla Yüzleşmek” (2017), “Osmanlı`dan Cumhuriyete Güç Odaklarının mücadelesi” (2018) adlı kitabların müəllifi və 2017-ci ildə Mustafa Kamal Atatürkə həsr olunmuş “Mucize” adlı pyesi ilə “İsmet Küntay-En İyi Oyun Yazarı” mükafatının laureatıdır.

2008-2010-ci illərdə Baş Qərargah rəisi (Genelkurmay Başkanı) olan orgeneral İlkər Başbuğ 2010-cu il avqustun 30-dan təqaüddədir.