“25 Years of Transformations of Higher Education Systems in Post-Soviet Countries” (Keçmiş Sovet İttifaqı Ölkələrində Ali Təhsil Sisteminin 25 İllik Transformasiyası) kitabı beynəlxalq nəşriyyat evi “Palgrave Macmillan”da 2018-ci ildə çap edilmişdir. Xəzər Universitetinin təsisçisi, Direktorlar və Qəyyumlar Şurasının sədri Professor Hamlet İsaxanlının Təhsil İnstitununun əməkdaşı xanım Aytac Paşayeva ilə birgə hazırladığı “Higher Education Transformation, Institutional Diversity and Typology of Higher Education Institutions in Azerbaijan” (Ali Təhsilin Transformasiyası, İnstitusional Fərqliliklər və Ali Təhsil İnstitutlarının Tipologiyası)  adlı fəsil bu kitaba (s. 97-121) daxil edilmişdir. Kitab keçmiş Sovet İttifaqı ölkələrinin ali təhsil müəssisələrində baş verən dəyişikliklərə dair ilk dərin araşdırma aparan qlobal layihə sayılır.

Qeyd olunan nəşr vahid Sovet modelinin fərqli milli təhsil sistemlərinə necə çevrildiyini araşdırır. Kitab son 25 il ərzində regionda aparılan islahatlar və dəyişikliklərin hərtərəfli təhlili ilə fərqlənir, Sovetdən öncə, Sovetlər və post-Sovet dövründə qurulan və inkişaf edən institusional modellərin təkamül mənzərəsi üzərində dayanır. SSRİ-nin 15 ölkəsini əhatə edən bu kitab postsovet sistemlərində institusional mənzərənin transformasiyasını müqayisəli təhlil edir. Ali təhsil və sosiologiya sahələrində, xüsusən tarix və müqayisəli tədqiqatlarla maraqlanan tələbələr və tədqiqatçılar üçün olduqca dəyərli vəsaitdir.

Kitab “Palgrave-in Qlobal Ali Təhsil Sahəsində Araşdırmaları” seriyası altında nəşr edilmişdir və qeyd olunan keçiddə, palgrave.com saytında ödənişsiz yükləmək üçün elektron variantda mövcuddur:

https://www.palgrave.com/us/book/9783319529790.