2018-ci il aprel 30-da Xəzər Universitetində Erasmus+ PETRA layihəsi çərçivəsində İnkişaf Mərkəzi və layihə üzvlərinin təşkilatçılığı ilə növbəti məlumatlandırıcı seminar keçirildi. Seminar cari ilin martında Vyana Tətbiqi Elmlər Universitetində (Avstriya) müzakirə olunmuş universitet əməkdaşlarının tədqiqat vərdişlərinin inkişaf etdirilməsi, universitetlərdə keyfiyyətin təminatı məsələlərinin qoyuluşu və universitetlərdə beynəlmiləlləşmə işlərinin görülməsi məsələlərini çatdırmaq məqsədini daşıyırdı. Tədbirdə Xəzər Universitetinin Elmi İşlər üzrə prorektoru Dr. İradə Xəlilova, Təhsil fakültəsinin dekanı Dr. Elza Səmədova, Keyfiyyətin Təminatı Mərkəzinin direktoru Lyudmila Sotova və İnkişaf Mərkəzinin direktoru Raziyə İsayeva məruzələrlə çıxış etdilər və iştirakçıların suallarını cavablandırdılar. Xəzər Universitetinin rəhbərliyi və departamentlərinin əməkdaşları üçün nəzərdə tutulmuş seminarda universitetin fakültələrindən, mərkəzlərindən və kitabxanadan olan əməkdaşları iştirak edirdilər.