2018-ci il aprelin 28-də Qaradağ rayonunun mərkəzində yerləşən Mədəniyyət sarayında “Kainat” Tədris Mərkəzinin təşkilatçılığı ilə abituriyentlərin peşə-ixtisas seçimi istiqamətində maarifləndirilməsi üzrə konfrans keçirildi.

Konfrasda Qaradağ Rayon İcra başçısının müavini Təranə İsmayılova, Qaradağ Rayon Gənclər və İdman İdarəsinin rəisi Elçin Abbasov, Məşğulluq Mərkəzi, Azərbaycan Dövlət İqtisad Universitetinin, Xəzər Universitetinin, Azərbaycan Universitetinin, “Qərbi Kaspi” Universitetinin, Memarlıq və İnşaat Universitetinin təmsilçiləri, valideynlər, abituriyentlər və bəzi peşə təhsili verən kolleclərin və təşkilatların nümayəndələri də iştirak edirdilər. Konfrans əsasən abituriyentlərə və valideynlərə dövlət və özəl universitetlərin tanıtımı xarakteri daşıyırdı.

Tədbirdə Xəzər Universitetini Tələbələrin cəlb olunması üzrə işçi qrupun rəhbəri professor Fuat Rəsulov, Təhsil departamentinin koordinatoru Qoşqar Məhərrəmov, Mühəndislik və tətbiqi elmlər fakültəsinin müəllimi Kənan Şıxəliyev, Humanitar və sosial elmlər fakultəsinin dekan köməkçisi Paşa Aydayev və Multimedia Mərkəzinin əməkdaşı Əzizə Cəfərli təmsil edirdilər.

Mədəniyyət sarayının foyesində quraşdırılmış Xəzər Universitetinin stendində əməkdaşlarımız universitetin tanıtım broşürlərini, ixtisaslar üzrə bukletləri və eləcə də, təklif olunan güzəştlər və təqaüdlər haqqında məlumatların əks olunduğu açıqcaları valideynlərə və abituriyentlərə təqdim edilər, onları maraqlandıran sualları detallı şəkildə cavablandırdılar. Universitetimizin stendi iştirakçıların diqqət mərkəzində olmuşdur.