2018-ci il aprelin 20-də Xəzər Universitetində universitetin təsisçisi, Direktorlar və Qəyyumlar Şurasının sədri professor Hamlet İsaxanlının yubileyinə həsr olunan “Qloballaşan təhsil” adlı beynəlxalq simpozium işə başladı.

Simpoziumda Azərbaycan, Türkiyə, Macarıstan, Finlandiya, Albaniya, Avstriya və Bolqarıstandan olan alim və mütəxəssislər iştirak edirlər. İki gün ərzində 8 sessiyada onların məruzələri dinlənilib, müzakirə olunacaq.

Konfransdan əvvəl iştirakçılara Xəzər Universiteti Kamera orkestrinin ifasında qısa musiqi proqramı təqdim olundu.

Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı konfransı açaraq, iştirakçıları salamladı, konfransın əhəmiyyətindən danışdı və işinə uğurlar arzuladı.

Açılış mərasimində Nyu-York Tirana Universitetinin (Albaniya) rektoru professor Fatoş Tarifa, Çankaya Universitetinin (Türkiyə) professoru Buket Akkoyunlu çıxış etdilər.

Konfrans aprelin 21-də işini davam etdirib, başa çatacaq.