2018-ci ilin aprelin 6-dan 8-dək Türkiyə Cümhuriyyətinin Şanlıurfa şəhərində “Osmanlı sancağından Cümhuriyyət şəhərinə” adlı üçüncü beynəlxalq simpozium keçirildi. Simpoziumda Xəzər Universitetinin Tarix və arxeologiya departamentinin müəllimi tarix üzrə fəlsəfə doktoru Ziyad Əmrahov “Osmanlı imperiyasında hamidiyyə alayları Rusiya tarixşünaslığında” mövzusunda məruzə ilə çıxış etdi.

Azərbaycan, Özbəkistan, Qazaxıstan, Türkiyə, Albaniya və Ruminiyadan olan tədqiqatçıların təmsil olunduğu beynəlxalq simpoziumda çıxış edən natiq, əsasən, Osmanlı İmperiyasında “hamidiyyə alayları” məsələsi ilə bağlı Rusiya tarixşünaslığının mövqeyini simpozium iştirakçılarının diqqətinə çatdırmaqla yanaşı, müqayisəli təhlillərə də yer verdi. Məruzədən sonra dinləyicilərin sualları cavablandırıldı və rusiyalı tədqiqatçıların iddia etdikləri “guya bu süvari alayları Osmanlı ermənilərinin fiziki cəhətdən məhv edilməsini əsas məsələ kimi qarşısına qoymuşdu” kimi fikirlər çoxsaylı mənbələr əsasında təkzib edildi və göstərildi ki, Berlin konqresinin qərarlarından sonra Şərqi Anadoluda özlərinə dövlət yaratmaq planlarının boşa çıxmasını görən ermənilər imperiyanın şərq əyalətlərində daxili münasibətləri kəskinləşdirmiş, terrorçu qruplaşmalar yaradaraq, imperiyanın digər xalqları, xüsusilə, kürdlər, çərkəzlər və türk əhalisini soyqırıma məruz qoymuşdular. Yaranmış vəziyyətin gərginliyini nəzərə alan Osmanlı hökuməti isə həm sərhədlərin təhlükəsizliyi, həm də daxili ictimai-siyasi vəziyyəti nəzarətdə saxlamaq üçün yeni islahatlar keçirmiş, daha sağlam ordu birləşmələri – hamidiyyə alayları yaratmışdır.