Aprelin 11-də Xəzər Universitetinin Khazar Journal of Humanities and Social Sciences (“Xəzər humanitar və sosial elmlər jurnalı”) beynəlxalq elmi jurnalının baş redaktor assistenti, sosial elmlər üzrə fəlsəfə doktoru Xəyalə Məmmədova onlayn rejimdə Hohai Universitetinin (Çin Xalq Respublikası) Beynəlxalq əməkdaşlıq ofisinin təşkil etdiyi Hohai Araşdırma Forumunun növbəti seminarında iştirak etmişdir.

Hohai Universitetinin Biznes fakültəsinin dekanı, Beynəlxalq əməkdaşlıq ofisinin direktoru professor Vanq Qun (Wang Qun) seminarı açaraq, Hohai Araşdırma Forumunun əhəmiyyətindən danışmışdır.

Seminar təşkilatçısı Mudassar Sarfraz indiyə qədər forumun xarici ekspertlərin iştirakı ilə həyata keçirdiyi seminarlar haqqında məlumat verərək, beynəlxalq əməkdaşlıqlarını da yüksək səviyyədə inkişaf etdirdiklərini qeyd edəndən sonra sözü X. Məmmədovaya vermişdir.

X. Məmmədova məruzəsində mühüm elmi-tədqiqat nəticələrinin əldə olunmasında və təbliğində böyük əhəmiyyətə malik olan beynəlxalq elmi bazaların imkanlarından istifadə metodları, yüksək indeksli beynəlxalq jurnallarda məqalələr üçün qoyulan tələblər, müasir beynəlxalq jurnalların idarə edilmə prinsipləri, elmi-tədqiqat metodları, elmi məqalələrin təqdimetmə qaydaları və digər praktiki məsələlərlə bağlı seminar iştirakçılarına geniş məlumat vermiş, onların suallarını cavablandırmışdır. Seminar iştirakçıları Hohai Universitetinin müxtəlif fakültələrində təhsil alan və çalışan gənc alimlər və doktorantlar idi.