2018-ci il martın 19-da Xəzər Universitetinin Karyera Mərkəzinin təşəbbüsü ilə universitetlə Azərbaycan Respublikası Gənclər Təşkilatları Milli Şurası arasında tələbələrin təcrübə keçməsinə dair müqavilə imzalamışdır. Müqaviləyə əsasən Xəzər Universitetinin tələbələri Milli Şuranın katibliyində təcrübə keçəcəklər. Onlar müxtəlif departamentlərdə fəaliyyət göstərərək, gələcək karyeraları üçün vacib olan bilik və bacarıqlara yiyələnəcəklər.
Müqavilə imzalanarkən nəzərə çatdırılmışdır ki, Azərbaycanın ilk özəl ali təhsil müəssisəsi olan Xəzər Universiteti dünya, Avrasiya və gənc universitetlərin QS World University Rankings beynəlxalq təşkilatı tərəfindən müəyyənləşdirilən reytinq cədvəllərində daim yuxarı yerləri, Azərbaycan üzrə isə birinci yeri tutur. Universitetin təhsil profilinə bakalavriat və magistratura ilə yanaşı, doktorantura proqramları və Azərbaycanda ən geniş MBA proqramı daxildir. Universitet dünyanın bir sıra nüfuzlu universitetləri ilə, aparıcı yerli və beynəlxalq şirkətlərlə səmərəli əlaqələr qurmuşdur.
Universitetdə humanitar və sosial elmlər, mühəndislik və tətbiqi elmlər, iqtisadiyyat, menecment və biznesin idarə olunması kimi müxtəlif ixtisaslar üzrə hazırlanan kadrlar dövlət müəssisələrində, özəl yerli və xarici şirkətlərdə çalışır, rəhbər vəzifələr tuturlar.
Qeyd edək ki, Azərbaycan Respublikası Gənclər Təşkilatları Milli Şurası 1995-ci ildən fəaliyyət göstərir. Təşkilatın məqsədi gənclərin bilik və bacarıqlarının Azərbaycan dövlət müstəqilliyinin möhkəmlənməsinə, beynəlxalq aləmdə layiqli yer tutmasına, demokratik quruculuq işlərinə yönəltməkdir. 1997-ci ildən Avropa Gənclər Forumu, Türk Dünyası Gənclər Birliyinin tam hüquqlu üzvü, 2002-ci ildən BMT-nin İqtisadi və Sosial Şurasının məşvərətçi statuslu üzvü, İslam Konfransı Təşkilatının Gənclər Forumunun həmtəsisçisi və tamhüquqlu üzvü, “Böyük İpək Yolu” beynəlxalq gənclər təşkilatının həmtəsisçisi, 2014-cü ildən Dünya Gənclər Assambleyasının tamhüquqlu üzvüdür.
Əlavə məlumatı bu link vasitəsilə əldə etmək olar: