2018-ci il martın 6-da Xəzər Universitetinin “Neftçilər” kampusunda Malang İslam Universitetinin (UNISMA) nümayəndələri ilə görüş keçirildi.

1981-ci ildə təsis edilən UNISMA İndoneziya Tədqiqat və Texnologiya Nazirliyi və Diyanət İşləri Nazirliyi nəzdində fəaliyyət göstərən və 10 fakültəsində müxtəlif proqramlar təklif edən bir ali təhsil müəssisəsidir.

Görüş İndoneziya Respublikasının Azərbaycandakı səfiri Dr. H.Husnan Bey Fananie-in təşəbbüsü ilə təşkil olunmuşdu və iki ölkənin ali təhsil müəssisələri arasında əlaqələrin möhkəmləndirilməsinə yönəlmişdir. Görüşdə İndoneziya universitetini UNISMA rektoru professor Dr. H.Masykuri Bakri, Akademik və əməkdaşlıq məsələləri üzrə prorektor professor Dr. H.Junaidi Mistar və Əməkdaşlıq şöbəsinin rəhbəri İmam Wahyudi Karimullah, İndoneziya Respublikasının Səfirliyini isə səfir cənab H.Husnan Fananie, birinci katib xanım Anggraeni Widiastuti və tərcüməçi Pərvanə Kərimova təmsil edirdilər.

Xəzər Universitetindən görüşdə rektor Dr. Hassan Niknafs, Tədris işləri üzrə prorektor professor Məhəmməd Nuriyev və Beynəlxalq Əlaqələr Şöbəsinin direktoru Turan Cəfərova iştirak edirdilər.

Görüş hər iki universitetin təqdimatı və qarşılıqlı faydalı tərəfdaşlıq sahələrinin müzakirəsi ilə başlandı. Tərəflər təbliğat materialları və hədiyyələri təqdim etdilər. Görüşün sonunda tərəflər arasında anlaşma memorandumu imzalandı.