2018-ci il fevralın 14-də Türkiyənin İstanbul şəhərində Lütfi Kırdar Konqres Mərkəzində EURIE-2018 Sammitinin rəsmi açılışı oldu. Sammitdə dünyanın 80 ölkəsindən 400-ə yaxın universitet, institut, təhsil qurumları və digər təşkilatlar iştirak edirdilər. Açılışda Türkiyənin və xarici ölkələrdən dəvət olunmuş dövlət rəsmiləri çıxış etdilər.

Sammitin rəsmi açılışından sonra konqres mərkəzində universitetlərin və digər qurumların Təhsil Sərgisinin nümayişinə başlanıldı. Rəsmi qonaqlar Xəzər Universitetinin sərgi salonunu ziyarət etdilər. Hər il olduğu kimi, bu il də Xəzər Universiteti öz sərgi salonu ilə seçilirdi. Universitetin sərgi salonunda bakalavr, magistr, doktorantura bölmələrini özündə əks etdirən xüsusi banerlər, Azərbaycanın və Xəzər Universitetinin bayraqları, masaüstü broşürlər, bloknotlar, qələmlər, çantalar və digər əşyalar var idi. Universitetin İctimai əlaqələr və media üzrə direktoru Əlövsət Əmirbəyli sammitin ilk günü universitet adından brifinq təşkil etdi.

Xəzər Universitetini ziyarət edən çoxsaylı qonaqlar universitet haqqında xoş sözlər söylədilər. Sammitin ikinci günü Malayziyanın Elm və Ali təhsil naziri İdris Yusuf və rəhbərlik etdiyi nümayəndə heyəti şəxsən Xəzər Universitetini ziyarət etdi və universitetlə yaxından tanış oldu. Ə.Əmirbəyli malayziyalı naziri Bakıya, Xəzər Universitetinə dəvət etdi. İdris Yusuf dəvət üçün dərin təşəkkürünü bildirdi. Sammitin üçüncü günü EURAS-ın prezidenti, Dr. Mustafa Aydın Xəzər Universitetinin sərgi salonunu ziyarət etdi və sərgi salonu haqqında xoş sözlər söylədi və Universitetin rəhbərliyinə dərin təşəkkürünü bildirdi. M.Aydın Xəzər Universiteti tərəfindən summitə həsr olunmuş xüsusi təqvimləri çox bəyəndiyini və bu cür təşəbbüslərin EURAS-ın digər üzvləri tərəfindən də həyata keçirilməsini arzuladı. Elə həmin gün Ə.Əmirbəyli EURAS-ın İdarə Heyətinin toplantısında Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlının adından iştirak etdi. EURIE-2018 Sammitinin Təşkilat Komitəsi adından Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlıya şəxsən təşəkkür elan edildi.

EURIE-2018 Sammitində Xəzər Universitetinin sərgi salonunu İngiltərə, İtaliya, Amerika Birləşmiş Ştatları, Rusiya, Türkiyə, Ukrayna və digər ölkələrdə fəaliyyət göstərən universitetlərin nümayəndələri ziyarət etdilər. Bütün qonaqlara Xəzər Universiteti haqqında geniş məlumat verildi və universitetin hədiyyələri təqdim edildi.

Sammitin sonuncu günü xatirə şəkli çəkildi.