2018-ci il fevralın 16-da Xəzər Universitetinin Mərmər salonunda Türkiyə Elm və Ədəbiyyat Əsərləri Sahiblərinin Peşə Birliyinin (İLESAM) dəstəyi ilə hazırlanmış Elçin Arifoğlunun Xocalı soyqırımına həsr edilmiş “Kağız qəbir” filmi nümayiş olundu. Tədbirdə rektor Hassan Niknafs başda olmaqla universitetin rəhbərliyi, əməkdaşları, tələbələr və qonaqlar – İLESAM-ın Baş müdiri Mehmet Nuri Parmaksız və İLESAM-ın Azərbaycan üzrə nümayəndəsi, Azərbaycan Yazıçılar Birliyinin (AYB) Mətbuat katibi Xəyal Rza iştirak edirdilər.

Filmin nümayişindən əvvəl universitetin İdarəetmə və tələbə işləri üzrə prorektoru İsaxan İsaxanlı çıxış edərək, Xocalı soyqırımının 26-cı ildönümü ilə əlaqədar Azərbaycanda və xarici olkələrdə tədbirlərin keçirildiyi haqqında danışdı, Türkiyənin müxtəlf qurumları və ziyalılarının bu sahədəki işini xüsusi qeyd etdi və nümayiş olunacaq filmin də buna bariz nümunə olduğunu söylədi.

İLESAM-ın Baş müdiri Mehmet Nuri Parmaksız çıxışında Xocalı faciəsi qurbanlarının xatirəsinin Türkiyədə də daim yad edildiyindən və filmin məziyyətlərindən bəhs etdi.

Sonra film nümayiş olundu və tamaşaçılarda dərin təəssürat yaratdı.