Xanımlar və Bəylər,

Hörmətli Rektor,

Cənab Nazir,

Əziz həmkarlar və dostlar!

İvane Cavaxişvili adına Tbilisi Dövlət Universitetinin 100 illik yubileyində iştirak etmək çox xoşdur və bu mərasimdə çıxış etmək mənim üçün böyük şərəfdir.

Mənim üçün bu an dünya üç əsas hissədən ibarətdir. Birinci, Gürcüstan Respublikası mənim vətənimdir. Mən Gürcüstanda doğulmuş azərbaycanlılardan biriyəm. Burada doğulmuşam, uşaqlığım burada keçib, orta məktəbi burada bitirmişəm. Anam və qardaşım burada yaşayır. Bura tez-tez gəlirəm – evimizə, gürcü dostlarımla görüşə; bir sıra beynəlxalq layihələri, həmçinin Gürcüstanla bağlı layihələri həyata keçirmək üçün buranı ziyarət edirəm. Hər zaman Gürcüstana böyük məmnuniyyətlə səfər edirəm.

Mənim dünyamın ikinci hissəsi Azərbaycan Respublikasıdır. Azərbaycanda yaşayıram, işləyirəm. Elmi və bədii yaradıcılıqla məşğul oluram. 27 il əvvəl Azərbaycanın ilk özəl universitetini – Xəzər Universitetini qurdum. Keçən il Xəzər Universiteti dünyanın 150 ən yaxşı gənc (yaşı 50-ni keçməyən) universiteti sırasına daxil oldu (QS University Ranking).

Xəzər Universiteti, Gürcüstan universitetləri ilə sıx əlaqədədir, bir sıra beynəlxalq layihələrdə onlarla birlikdə çalışır və əməkdaşlıq edir.

Dünyamın 3-cü hissəsi – Gürcüstan və Azərbaycandan kənarda olan böyük dünyadır, hər zaman səyahət etdiyimiz, iş birliyində olduğumuz böyük dünya! Burada, dünyanın müxtəlif bölgələrindən gəlmiş həmkarlarımı salamlayır, xoş gəldiniz deyir və uğurlar arzulayıram.

Hər xalq kimi gürcü xalqı da Şota Rustaveli kimi öz böyük ədəbiyyat və sənət adamları ilə, İvane Cavaxişvili, Nikoloz Musxeleşvili kimi elm adamları ilə fəxr edir. Və nəhayət, öz qabaqcıl institutları, xüsusilə, yeni biliklər istehsal etmək gücünə malik İvane Cavaxişvili adına Tbilisi Dövlət Universiteti kimi institutları ilə fəxr edir!

Ad günün mübarək, İvane Cavaxişvili Tbilisi Dövlət Universiteti!

Xəzər Universiteti adından, Azərbaycanın elm və sənət adamları adından Sizi – əziz dostlar, əziz İvane Cavaxişvili Tbilisi Dövlət Universiteti, əziz Gürcüstan – təbrik edirəm!

Hamlet İsaxanlı

Təsisçi

Direktorlar və Qəyyumlar Şurasının sədri

Xəzər Universiteti