2018-ci il yanvarın 10-da Xəzər Universitetinin Karyera Mərkəzinin meneceri Səbinə Allahverənova ilə Beynəlxalq Avrasiya Mətbuat Fondunun (BAMF) prezidenti Umud Mirzəyev görüşdülər.

Görüş zamanı, psixologiya ixtisası istisna olmaqla, Xəzər Universiteti Humanitar və sosial elmlər fakültəsində oxuyan tələbələrin təcrübə proqramı keçməsi barədə əməkdaşlıq müqaviləsi imzalandı.

Beynəlxalq Avrasiya Mətbuat Fondu müxtəlif ölkələrdən olan bir qrup jurnalistlər tərəfindən yaradılmaş müstəqil beynəlxalq qeyri-hökumət təşkilatıdır və 1992-ci ildə Azərbaycanda dövlət qeydiyyatına alınmışdır. BAMF BMT qurumları, Amerikanın Dövlət Departamenti, Avropa Komissiyası, Dünya Bankı, Beynəlxalq Mətbuat İnstitutu, Beynəlxalq Jurnalistlər Federasiyası, bir sıra xarici ölkələrin Azərbaycan Respublikasındakı səfirlikləri, nazirliklər, agentliklər, eləcə də, regiondakı yerli və beynəlxalq QHT-ları ilə əməkdaşlıq çərçivəsində fəaliyyət göstərir.