Azərbaycanın görkəmli filosof alimi, fəlsəfə elmləri doktoru, əməkdar elm xadimi, Xəzər Universiteti Tərcümə Araşdırmalar Mərkəzinin direktoru, “Xəzər Xəbər” jurnalı redaksiya heyətinin üzvü, professor Camal Vəli oğlu Mustafayev 2017-ci il dekabrın 2-dən 3-nə keçən gecə 89 yaşında fəvat etmişdir. Camal Mustafayev 1928-ci ildə Gürcüstanın Qarayazı rayonunun (indiki Qardabani) Kosalı kəndində anadan olmuşdur. Orta təhsilini 1935-1944-cü illərdə Kosalı kənd orta məktəbində almışdır. Sonra Tbilisidə ikiillik Müəllimlər İnstitutunda oxumuşdur. 1946-1948-ci illərdə Kosalı kəndində müəllim işləyib. 1948-ci ildə Azərbaycan Dövlət Universitetinin (indiki Bakı Dövlət Universiteti) fəlsəfə şöbəsinə daxil olub. 1949-cu ildə Moskva Dövlət Universitetinə keçirilib və oranı 1952-ci ildə bitirib. İki il Qarayazı rayonunda məktəb direktoru işləyib.

1954-1957-ci illərdə SSRİ EA Fəlsəfə İnstitutunun əyani aspirantı olub. Aspirantura illərində onun elmi araşdırmaları "Nizaminin fəlsəfi və etik görüşləri" mövzusu ətrafında olmuşdur. O, bu mövzuda namizədlik dissertasiyası müdafiə etmişdir. 1957-1968-ci illərdə Camal Mustafayev Azərbaycan EA Fəlsəfə və Hüquq İnstitutunda kiçik elmi işçi, elmi işçi və baş elmi işçi vəzifələrində işləmişdir.

1968-ci ildə o, Azərbaycan Dövlət Universitetinin müdafiə şurasında "Nizaminin ideyalar aləmi və müasirlik" mövzusunda doktorluq dissertasiyası müdafiə edərək, fəlsəfə elmləri doktoru alımlik dərəcəsinə layiq görülmüşdür. 1968-1976-cı illərdə Azərbaycan Pedaqoji Xarici Dillər İnstitutunda (indiki Azərbaycan Dillər Universiteti) fəlsəfə kafedrasının müdiri işləmişdir.

1976-cı ildən 1999-cu ilədək Azərbaycan Dövlət Universitetinin professoru olmuşdur. 1985-1991-ci illərdə universitetdə etika-estetika kafedrasının müdiri vəzifəsində çalışmışdır. Professor Camal Mustafayev 1999-cu ildən Xəzər Universiteti Tərcümə Araşdırmalar Mərkəzinin direktoru vəzifəsində işləmişdir.

Camal Mustafayev orta əsrlər Azərbaycan fəlsəfi fikri sahəsində bir sıra sanballı əsərlər çap etdirmişdir. Xüsusən, onun Nizami fəlsəfəsinə, XII əsr Azərbaycan düşüncəsinə aid əsərləri geniş oxucu kütləsinə bəllidir. Moskva və başqa şəhərlərin nüfuzlu jurnallarında əsərləri çap olunmuşdur. Onun Müsəlman şərq sosial utopiyasına aid tədqiqat işləri və s. əsərləri xarici dillərə tərcümə olunmuşdur. O, eyni zamanda müasir Azərbaycan şeirinin də tədqiqatçılarından idi.

Camal Mustafayevin elmi və pedaqoji fəaliyyəti 70-dən çox elmi və publisistik məqalə və müsahibələrdə, 2 monoqrafiyada öz əksini tapmışdır. O, çoxsaylı ölkə və beynəlxalq səviyyəli konqres, simpozium və konfransların iştirakçısı olmuş, məruzələr etmişdir.

Camal Mustafayev Azərbaycan fəlsəfəsi, etika və estetikası sahəsində bir sıra elmlər namizədi, elmlər doktoru yetişdirmişdir. O, BDU-nun, Azərbaycan EA-nın Fəlsəfə və Hüquq İnstitutunun müdafiə şuralarının, Xəzər Universiteti Elmi-inzibati Şurasının üzvü olmuşdur.

Görkəmli alim, səmimi və qayğıkeş insan Camal Mustafayevin xatirəsi onu tanıyanların qəlbində daim yaşayacaqdır.

Allah rəhmət eləsin!

Xəzər Universitetinin kollektivi