2017-ci il noyabrın 24-də “Bir” Tələbə-Könüllü Proqramı tərəfindən Xəzər Universiteti Tələbə Məclisinin təşkilatı dəstəyi, 150-dən çox tələbənin iştirakı ilə keçirilən təqdimat baş tutdu. Təqdimat zamanı tələbələrin böyük əksəriyyəti könüllü olmaq üçün www.konullu.edu.az portalından proqrama qoşuldu.

Tələbələrin böyük maraqla qatıldığı təqdimat zamanı iştirakçılara “Bir” Tələbə-Könüllü Proqramı, ölkəmizdə könüllülük fəlsəfəsi, proqramın əsas istiqamətləri və proqramın fəaliyyətlərində iştirak imkanları haqqında məlumat verildi. İnteraktiv üsulla keçirilən təqdimat zamanı tələbələr könüllülük haqqında fikirlərini bölüşdülər, kreativ təşəbbüslərlə çıxış etdilər.

Təqdimat zamanı həmçinin “Bir” Tələbə-Könüllü Proqramı və Bakı Şəhər Halqası Əməliyyat Şirkəti arasında “Formula-1” Avropa Qran Prisi çərçivəsində imzalanmış rəsmi əməkdaşlıq memorandumu əsasında tələbələrə “Formula-1” Avropa Qran Prisi zamanı könüllü olmağın üstünlükləri haqqında məlumat verildi. Bunun nəticəsində, tələbələr “Formula-1” Avropa Qran Prisində könüllü olmağa böyük həvəs və maraq göstərdilər.