2017-ci il noyabrın 15-də Xəzər Universiteti Beynəlxalq Əlaqələr Şöbəsinin heyəti tələbələr üçün mübadilə imkanları haqqında məlumat sessiyası keçirdi. Bu sessiyanı keçirməkdə əsas məqsəd tələbələr üçün yaradılan xaricdə təhsil imkanları, mübadilə proqramları haqqında ətraflı məlumat vermək və onlara bu imkanlardan necə yararlanmağın yollarını izah etmək idi. Şöbənin koordinatoru Günay Fərzəliyeva sessiya zamanı Erasmus+ və Mevlana mübadilə proqramlarından bəhs etdi. O, bu günə qədər proqramlardan yararlanmış tələbələrdən də nümunə gətirərək, mübadilə proqramlarının üstünlüklərindən danışdı. Beynəlxalq Əlaqələr Şöbəsinin direktoru Turan Cəfərova tələbələri proqramlara müraciət edərkən diqqət etməli olduqları məqamlar haqqında məlumatlandırdı.

Görüş sual-cavab ilə yekunlaşdı.

Məlumat sessiyası Beynəlxalq Əlaqələr Şöbəsi tərəfindən təşkil olunan Beynəlxalq Təhsil Həftəsi (13-17 noyabr) çərçivəsində keçirilən 3-cü tədbir idi.