2017-ci il oktyabrın 27-də Xəzər Universitetinin tarix müəllimliyi ixtisası üzrə təhsil alan I kurs tələbələri Milli Azərbaycan Tarixi Muzeyində fond işinin təşkili haqqında “Milli Azərbaycan Tarixi Muzeyində fond işinin təşkili və əhəmiyyəti” adlı mühazirə dinlədilər. Muzeyin Arxeologiya elmi fond şöbəsinin müdiri t.ü.f.d. Nasir Quluzadənin oxuduğu və slaydlarla müşayiət olunan mühazirəni tələbələr maraqla dinlədilər. Mühazirədə Arxeologiya fondunda mühafizə edilən kolleksiyaların tərkibi, arxeoloji materialların inventarizasiyası və pasportlaşdırılması, saxlanc yerlərinin tipləri, sanitar təmizləmə işlərinin əhəmiyyəti haqqında danışıldı. Həmçinin təhlükəsizlik sistemlərinin vəziyyəti, texniki avadanlıq və qurğuların iş prinsipi, restavrasiya və konservasiya işlərinin gedişi haqqında geniş məlumat verildi. Sonda tələbələrə Arxeologiya fondu ilə əyani tanışlıq üçün ekskursiya təşkil edildi.