2017-ci il oktyabrın 11-də Azərbaycan Respublikasının Fransadakı Səfirliyi nəzdində fəaliyyət göstərən Azərbaycan Mədəniyyət Mərkəzində Xəzər Universiteti və “Dünya” məktəbinin təqdimatı keçirildi. Mərkəzdə Xəzər Universitetinin fəaliyyətini əks etdirən foto qalereya, Xəzər Universteti Nəşriyyatının əsərlərindən (kitablar, lüğətlər, jurnallar və s.) ibarət sərgi nümayiş edildi. Sərgidə nümayiş etdirilən bütün əsərlər və Azərbaycanı təcəssüm etdirən digər rəmzi hədiyyələr Mədəniyyət Mərkəzinə təqdim edildi. Daha sonra isə Azərbaycan Respublikasının Fransadakı səfirinin Siyasi işlər üzrə müşaviri Nigar xanım Hüseynova Azərbaycan Mədəniyyət Mərkəzinin fəaliyyəti haqqında qonaqlara və sərgi iştirakçılarına geniş məlumat verdi.