2017-ci il sentyabrın 26-da Xəzər Universiteti Psixologiya departamentində ümumi psixologiya və klinik psixologiya ixtisası üzrə magistratura tələbələrinin dissertasiya işlərinin müdafiəsi təşkil edildi. Müdafiə şurasında Humanitar və sosial elmlər fakültəsinin dekanı dosent Cabir Xəlilov, dekan müavini Ph.D (st.) Mələk Kərimova, Ph.D (nam.) Cabir Məmmədli, p.ü.f.d. Ləman Verdiyeva, Ph.D (st.) Validə Kərimova da iştirak edirdilər.

Müdafiə şurasının sədri universitetin Magistratura, doktorantura və elmi işlər bölməsinin müdiri fəlsəfə üzrə fəlsəfə doktoru Eldar Şahgəldiyevin rəhbərliyi ilə keçirilən müdafiədə müzakirələrə yer verildi və iddiaçılar sualları cavablandırdılar. Ümumi psixologiya ixtisası üzrə magistr tələbələri Vəfa Həşimova “Yeniyetmələrdə təfəkkür çevikliyinin təzahür xüsusiyyətləri”, Aysel Xanməmmədova “Gənclərdə mənəvi inkişafı şərtləndirən amillərin psixoloji təhlili”, klinik psixologiya ixtisası üzrə magistr tələbə Günay Bayramova isə (elmi rəhbər: İkram Rüstəmov) “Universitet tələbələri arasında internet asılılığı və depressiya arasında əlaqə” adlı dissertasiya işlərini uğurla müdafiə etdilər. 

Müdafiə prosesində Xəzər Universitetinin klinik psixologiya birinci kurs magistr tələbələri də həvəslə iştirak edirdilər. İddiaçılar Vəfa Haşımova və Aysel Xanməmmədovanın dissertasiyasıya işlərinin elmi rəhbəri Bakı Dövlət Universitetinin Psixologiya kafedrasının müəllimi p.ü.f.d. Müşfiq Mustafayev Müdafiə şurasında şura üzvlərinin suallarını cavablandırdı. Müdafiəyə təqdim olunan işlər müsbət qiymətləndirildi və iddiaçılara magistr dərəcəsi verilməsi qərara alındı.