2024-cü ilin martın 31-də Xəzər Universitetinin Humanitar, təhsil və sosial elmlər fakültəsinin tarix müəllimliyi ixtisasının ikinci kurs tələbələri “Müharibələr tarixi” fənninə aid olan “Azərbaycanın müdafiə tikililəri” mövzusu ilə bağlı olaraq AMEA Arxeologiya və Antropologiya İnstitutunun “Arxeoloji abidələrin toplusu şöbəsi” və Xəzər Universitetinin Tarix və arxeologiya departamentinin təşkilatçılığı ilə “Atəşgah məbədi”, “Dördkünc Mərdəkan qalası”, “Dairəvi Mərdəkan qalası” və “Ramana qalası” abidələrində tədris ekskursiyasında olublar. Azərbaycan Milli Elmlər Akademiyasının (AMEA) əməkdaşları Dos. Mikayıl Mustafayev, Nərminə Hüseynova, Orxan Zamanov və tələbələrin təşəbbüsü ilə təşkil olunan xüsusi akademik ekskursiya Azərbaycanın müdafiə memarlığının vacib tərkib hissəsi olan Bakı- ətrafı qalaların xalqımızın hərb tarixindəki mühüm rolunun əyani qavranması baxımından əhəmiyyətli idi.
İlk olaraq səfərin öncədən təyin olunmuş proqramına əsasən “Atəşgah məbədi” Dövlət Tarix-Memarlıq Qoruğu ərazisinə səfər edildi. Burada ekskursiya zamanı bələdçi abidə ərazisindəki tarixi tikililəri və eksponatları əyani şəkildə göstərərək tələbələri ətraflı məlumatlandırıldı. Daha sonra səfərin əsas hissəsi olan Mərdəkan və Ramana qalalarına maraqlı ekskursiya başlandı. Dördkünc qalanın ziyarəti zamanı Mərdəkanın ağsaqqalarından biri olan Vidadi Yaptumov tələbələrə Mərdəkan tarixi, burada olan tikililər, “Dördkünc Mərdəkan qalası” və “Dairəvi Mərdəkan qalası” haqqında məlumat verdi. Sonra isə tələbələr qalaya qalxaraq xatirə şəkilləri çəkdirdilər. Mərdəkandakı ikinci Dairəvi qala ərazisi də ziyarət edildi və burada da maraqlı xatirə şəkilləri çəkildi. Sonda, tələbələr qədim tarixə malik olan Ramana kəndinə səfər edərək “Ramana qalası”nı da ziyarət etdilər. Burada olan bələdçi tələbələrə ərazinin və qalanın tarixi haqqında geniş məlumat verdi və onları qalanın ətrafının və daxilinin əyani şəkildə vəziyyəti ilə tanış etdi.
Tədris ekskursiyası zamanı fənn müəllimi O. Zamanov, və orta əsr mütəxəsisləri M.Mustafayev, N.Hüseynova tələbələrə sözügedən qalaların tədqiqi, nə məqsədlə istifadə olunması və onların ölkəmizin tarixində yeri haqqında ətraflı danışdı və onlarla başqa Azərbaycan qalaları barədə geniş diskussiya apardı. Abidələr ilə əyani tanışlıq tələbələr tərəfindən maraqla qarşılandı. Müzakirələr və sorğular ilə keçən ekskursiya planlaşdırıldığı vaxtda yekunlaşdı.