Xəzər Universitetinin koordinatoru olduğu Avropa İttifaqının "Erasmus+ K2" proqramı çərçivəsində maliyyələşdirilən “Azərbaycanda İnstitusional Repozitoriyalar Şəbəkəsi vasitəsilə Tədqiqat Potensialının İnkişafı” (DIRNA) adlı layihənin ikinci təlim treninqi İtaliya Respublikasının L’Aquila Universitetində keçirilib. Türkiyə, İtaliya və Finlandiya universitetlərinin təcrübəsi əsasında Azərbaycanın 8 ali təhsil müəssisəsində hamıya əlçatan institusional repozitoriyalar (elektron arxivlər) şəbəkəsinin yaradılması məqsədi daşıyan layihə çərçivəsindəki təlim 2024-cü il martın 12-14-də keçirilib.

Təhsil turunda Xəzər Universiteti ilə bərabər 7 tərəfdaş Azərbaycan universiteti (Bakı Dövlət Universiteti, Azərbaycan Texniki Universiteti, Azərbaycan Dövlət Gömrük Komitəsinin Akademiyası, Gəncə Dövlət Universiteti, Naxçıvan Dövlət Universiteti, Lənkəran Dövlət Universiteti, Mingəçevir Dövlət Universiteti) iştirak edib. Xəzər Universitetini tədbirdə Kitabxana İnformasiya Mərkəzinin direktoru Tatyana Zaytseva və direktor müavini Aytac Misgərli təmsil ediblər.

Təlimin ilk günü L’Aquila Universitetinin Beynəlxalq əlaqələr üzrə rektor məsləhətçisi Anna Tozzi qonaqları salamlayıb, daha sonra universitetin kitabxana direktoru Dr. Grazia Di Bartolomeo universitet kitabxanasının universitetin təhsilinin və tədqiqatının inkişafında rolu haqqında məlumat verib.

Təlimin ikinci günü universitetin tədqiqat informasiya sistemində IRIS açıq girişli resurslar haqqında təqdimatlar və müzakirələr aparılıb. Daha sonra universitetin kitabxana filiallarına turlar təşkil olunub.

Son gün açıq məlumat (Open Data) haqqında təqdimat keçirilib və bütün keçirilən təlimlərin müzakirəsi aparılıb.

Ümumilikdə təlim dövrü ərzində kitabxana sistemi, onun fəaliyyəti, missiyaları, saytı, açıq resursları və abunə bazaları, kitabxananin repozitariya sistemi haqqında təqdimatları, həmçinin ümumilikdə İtaliya kitabxanalarının onlayn şəbəkələri ilə bağli çıxışlar dinlənilib.