Avropa İttifaqının maliyyə dəstəyi və Bakı Biznes Universitetinin koordinatorluğu ilə həyata keçirilən "Azərbaycanda Rektorlar Konfransının Yaradılması (ECAR) Layihəsi" çərçivəsində 2024-cü il fevralın 21-də pilot olaraq yaradılmış Elmi İşlər Üzrə Komitənin növbəti iclası keçirilib. İclasda Elmi İşlər Üzrə Komitənin üzvü kimi Xəzər Universitetinin Təbiət elmləri, sənət və texnologiya yüksək təhsil fakültəsinin elmi işlər üzrə dekan müavini Günel Bahəddinova iştirak edib.

Bakı Biznes Universitetinin rektoru, Prof. İbad Abbasov iclasda açılış nitqi ilə çıxış edərək, layihənin Azərbaycan ali təhsilinə verdiyi və verə biləcəyi töhfələr barədə ətraflı danışıb. Deyib ki, Elmi İşlər Üzrə Komitənin fəaliyyəti elmi tədqiqatlar sahəsində və universitetlər arasında qarşılıqlı əməkdaşlığın gücləndirilməsində mühüm rol oynayır.

İclasda layihə koordinatoru, Bakı Biznes Universitetinin Universitet-Sənaye İş Birliyi Şöbəsinin müdiri Gülşən Bayramova layihə çərçivəsində görülən işlərə dair qısa hesabatla çıxış edərək, layihəyə 15 tərəfdaş universitetin qoşulduğunu, 8 universitetin assosiativ üzv olduğunu söyləyib.

Layihə çərçivəsində pilot olaraq yaradılan Elmi İşlər Üzrə Komitənin sədri Dr. Elçin Süleymanov komitənin 2023-cü ildəki fəaliyyətini əhatə edən hesabatı təqdim edib. Azərbaycan Rektorlar Şurasının Elmi İşlər Üzrə Komitəsi 2023-cü il boyunca ali təhsil müəssisələrində elmi tədqiqat fəaliyyətinin inkişafı sahəsində mühüm işlər həyata keçirib. İl ərzində 10 online və oflayn toplantı təşkil edilib, universitetlərin elmi tədqiqat fəaliyyətləri üzrə anketlər keçirilib və elmmetrika və elmi nəşrlərə dair 5 təlim təşkil olunub. Komitə, həmçinin, Azərbaycanda ali təhsil müəssisələrində TEC (Təhsil və Elm) fəaliyyətinin təşkili ilə bağlı mövcud normativ-hüquqi bazanın araşdırılması və onun təkmilləşdirilməsinə dair təkliflər hazırlayıb. Universitet elmi jurnallarının müzakirəsi, DOİ indeksinin alınması və Açıq Jurnal Sistemində (OJS) elmi jurnalların inteqrasiyası kimi mövzular da gündəmdə olub.

Yekunda Elmi işlər üzrə komitəyə yeni sədr seçilməsi ilə səsvermə həyata keçirilib. Bakı Avrasiya Universitetinin elmi işlər üzrə prorektoru Prof. Gülzar İbrahimova sədr, Azərbaycan Dövlət Mədəniyyət və İncəsənət Universitetinin elmi işlər üzrə prorektoru Sədaqət Əliyeva və Bakı Ali Neft Məktəbinin tədqiqat və innovasiyalar şöbəsinin müdiri İlkin Axundov sədr müavinləri seçilmişlər.