2024-cü il fevralın 22-də Xəzər Universitetinin Humanitar, Təhsil və Sosial Elmlər fakültəsinin Filologiya (Azərbaycan dili və ədəbiyyatı) ixtisası üzrə IV kurs tələbələri 2023-2024-cü tədris ilinin yaz semestri çərçivəsində Hədəf Şirkətlər Qrupunda filoloji-istehsalat təcrübəsinə başlayıblar. Filoloji-istehsalat təcrübəsində tələbələrin tədris prosesində əldə etdikləri nəzəri biliklərin müasir elmi yanaşmalar kontekstində tətbiqi həyata keçirilir.
İstehsalat təcrübəsinə rəhbərlik edən Xəzər Universitetinin Dillər və ədəbiyyatlar departamentinin müəllimi Dos. Ülvi Babasoy tələbələri Hədəf Şirkətlər Qrupu tabeliyində fəaliyyət göstərən Hədəf Təlim və Karyera Şirkətinin müdiri Mehdi Əliquliyev və Xan Nəşriyyatının direktoru Səbuhi Şahmursoy ilə tanış etdi. Mehdi Əliquliyev giriş sözü söylədi. Səbuhi Şahmursoy nəşriyyat işlərinin sirləri barədə tələbələri məlumatlandırdı. Təcrübə rəhbəri Dos. Ülvi Babasoy filoloji-istehsalat təcrübəsinin əsas məqsədinin praktik bacarıq və səriştələrin əldə edilməsindən ibarət olduğunu izah etdi. Görüş zamanı tələbələri maraqlandıran mövzular müzakirə olundu.