2024-cü il fevralın 21-də Xəzər Universitetində universitetin Ekoloji Tədqiqat Mərkəzinin (ETM) təşkilatçılığı ilə “Elektron tullantıların idarə olunması üçün Strateji yol Xəritələri” adlı tədbir keçirilib. Giriş sözü ilə Ekoloji Tədqiqat Mərkəzinin direktoru Rövşən Abbasov çıxış edib və elektron tullantılar haqqında qonaqlara geniş məlumat verib. Tədbirdə elektron tullantılar, onların yaratdığı fəsadlar və idarəetmə problemləri ilə bağlı müzakirələr dinlənilib.

Sonra ETM-də aparılan bir sıra tədqiqat və araşdırmalar təqdim edilib. Ekoloji tədqiqat Mərkəzinin əməkdaşları Dr. Rövşən Kərimov, Dr. Şahnaz Amanova və Ülkər Məmmədli müvafiq olaraq “Elektron tullantıların İdarə olunmasında əsas strateji yanaşmalar”, “Elektron tullantıların Azərbaycanda idarə olunma problemləri”, “Elektron tullantıları istehlakçılarının məlumatlılıq sınaqları: sorğuların nəticələri” mövzularında çıxış ediblər. Şahnaz Amanova “Genişləndirilmiş İstehlakçı məsuliyyəti və avans ödənilmə sistemlərinin elektron tullantıların idarə olunmasında tətbiqi” adlı tövsiyələr hesabatı ilə məruzə də edib.

Azərbaycan Respublikası Ekologiya və Təbii Sərvətlər Nazirliyinin nümayəndəsi Mehman Nəbiyev tədbirin əhəmiyyətindən danışaraq vurğulayıb ki, elektron tullantıların idarə olunması istiqamətində dövlət tərəfindən də əhəmiyyətli işlər görülməkdədir.

Tədbirdə əsasən dövlət təşkilatları, nazirlik və agentliklər olmaqla 20 təşkilatdan 35 nəfər iştirak edib.