2024-cü il yanvarın 22-24-də Türkiyənin Kütahya şəhərində yerləşən Dumlupinar Universitetinin nümayəndələri Hafize Er Türküresin və Baykal Biçer Erasmus+ İşçi Heyətinin Mobilliyi Mübadilə Proqramı (Erasmus+ KA107171) çərçivəsində Xəzər Universitetinin Humanitar, təhsil və sosial elmlər fakültəsi, həmçinin Beynəlxalq əlaqələr ofisi tərəfindən qəbul edilib.

Proqramın ilk günü Xəzər Universitetinin Humanitar, təhsil və sosial elmlər fakültəsinin dekan müavini Aygün Verdiyeva, Təbiət elmləri, sənət və texnologiya yüksək təhsil fakültəsinin elmi işlər üzrə dekan müavini Günel Bahəddinova, Dillər və ədəbiyyatlar departamentinin müəllimi Aynur Qəzənfərqızı, Təhsil departamentinin koordinatoru Leyla Əliyeva və Beynəlxalq əlaqələr şöbəsinin müdiri Fatimə Vəliyeva, koordinatorları Arzu Bədəlova, Əli Mirzəzadə və Turan Əlizadənin türkiyəli müəllim heyəti ilə tanışlıq görüşü keçirilib. Görüşdə Fatimə Vəliyeva Xəzər Universiteti haqqında geniş məlumat verib. Dumlupinar Universitetinin nümayəndələri öz universitetləri haqqında videoçarx nümayiş etdiriblər. Sonra isə Arzu Bədəlova qonaqlara kampus turu təşkil edib.

Ertəsi gün Humanitar, təhsil və sosial elmlər fakültəsinin əməkdaşları və fakültənin doktorantura tələbələrinin iştirakı ilə Hafize Er Türküresin “Fatih layihəsi və onun sosial tələbələrin təhsilinə təsiri” başlıqlı seminarı təşkil olunub. Bunun ardınca isə Baykal Biçer`in “Türkiyənin təhsil dəyərləri” adlı mühazirəsi dinlənilib və həmin gün tədbir Atəşgah məbədinə səfərlə yekunlaşıb.

Tədbirin üçüncü günü türkiyəli müəllim heyətinin Azərbaycan Dövlət Rəssamlıq Akademiyasının Muzey-Sərgi Kompleksinə səfəri təşkil olunub. Proqramın sonunda iştirakçılar sertifikatla mükafatlandırılıb.