Xəzər Universitetinin İdarəetmə və tələbə işləri üzrə prorektoru İsaxan İsaxanlı, Musiqi və incəsənət departamentinin rəhbəri Zülfiyyə Sadıqova 2023-cü il dekabrın 12-də Naxçıvan Dövlət Universitetində (NDU) olublar.
İkitərəfli görüşdə NDU-nun Tədris və tərbiyə işləri üzrə prorektoru Rafiq Rəhimov qonaqları salamlayaraq, universitetdə görməkdən məmnunluğunu bildirib. Prorektor ali təhsil ocağının maddi-texniki bazası, müasir tədris üsulları, beynəlxalq əlaqələri barədə danışıb.
Xəzər Universitetinin İdarəetmə və tələbə işləri üzrə prorektoru İsaxan İsaxanlı 1991-ci ildə Xəzər Universitetinin Azərbaycanda ilk dəfə özəl universitet kimi fəaliyyətə başladığını diqqətə çatdırıb. Prorektor tədrisi ingilis dilində həyata keçirilən ixtisaslar barədə ətraflı məlumat verib.
NDU-nun Elm və innovasiyalar üzrə prorektoru Elsever Əsədov çıxış edərək, birgə əməkdaşlıq məsələlərinə toxunub. Universitetlər arasında geniş heyətdə görüşün keçirilməsi və sahələr üzrə əməkdaşlıq barədə fikir mübadiləsi aparmaq qərara alınmışdır.
Sonda qonaqlara “Naxçıvan - Şərqin əfsanəsi” kitabı hədiyyə edilib.