Reproduktiv biotibb və kök hüceyrə tədqiqatları ilə dünyada tanınan, İranın qabaqcıl tədqiqat mərkəzi olan Royan İnstitutunun alimləri noyabrın 28-dən 29-dək Xəzər Universitetində olub, noyabrın 28-də maraqlı seminar proqramı ilə çıxış etmişlər. Somatik hüceyrə nüvə transferinə (SCNT) həsr olunmuş seminar Xəzər Universitetinin Həyat elmləri departamentinin akademik heyəti tərəfindən təşkil olunmuşdur.
Tədbirin açılışı Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlının səmimi salamlama nitqi ilə başladı. Sonra universitetin rektoru, Dos. İradə Xəlilova çıxış edərək, akademik əməkdaşlıqdan məmnunluğunu ifadə etdi.
Seminar SCNT-nin müxtəlif aspektlərini əhatə edən Royan İnstitutundan dəvət olunmuş alimlərin məruzələri ilə davam etdi.
Əvvəlcə Prof. Dr. Mohammad Hossein Nasr Esfahani tərəfindən “Klonlaşdırma, keçmişi-bügunü-gələcəyi” adlı maraqlı təqdimat edildi və bu məruzə vasitəsilə klonlaşdırma texnologiyasının tarixi və gələcək imkanları hərtərəfli nəzərdən keçirildi.
Royan İnstitutunun tədqiqatçısı Dr. Mehdi Hajian "SCNT-nin Texniki Aspektləri" ilə bağlı çıxış edərək, seminar iştirakçılarına Somatik Hüceyrə Nüvəsi Transferinin metodiki tərəflərini ətraflı izah etdi. Royan İnstitutundan Dr.Farnoosh Jafarpour “Klonlaşdırmanın Epigenetik tarixi” adlı təqdimatı ilə auditoriyanın böyük marağına səbəb oldu. Dr. Jafarpour öz təqdimatı ilə SCNT-nin epigenetik təsirlərinə nəzər salaraq, mürəkkəb bioloji proseslər haqqında məlumat verdi.
Seminarda Xəzər Universitetinin professor-müəllim heyəti və tələbələrin fəal iştirakı ilə mövzu ətrafında geniş müzakirələr aparıldı.
Seminar hər iki qurum arasında məlumat və fikir mübadiləsinə, həmçinin gələcək potensial əməkdaşlığa zəmin yaratdı.