2023-cü il dekabrın 4-8-də Elm və Təhsil Nazirliyinin dəstəyi ilə Bakı Ekspo Mərkəzində SAF 2023-Beynəlxalq STEAM Azərbaycan Festivalı keçirilib.

SAF 2023 ümumilikdə 14 yarış və 1 sərgi kateqoriyası üzrə təşkil edilib. Festivalın final mərhələsində 11 ölkəni təmsil edən 868 yerli, 159 xarici iştirakçı yarışıb. Əcnəbi iştirakçılar Türkiyə, Niderland, Çexiya, Bolqarıstan, Böyük Britaniya, Qazaxıstan, Norveç, Slovakiya, Türkmənistan və Özbəkistanı təmsil ediblər.

Beynəlxalq SAF 2023-də 27 komanda I, 73 komanda II, 67 komanda isə III yerə layiq görülüb. Xüsusi nominasiyalar üzrə isə 101 komanda qalib olub.

Hackathon Universitet kateqoriyasına 100+ komandadan 16 yerli, 3 xarici komanda final mərhələsində iştirak haqqı qazanmışdır. Bu komandalardan Xəzər Universitetini təmsil edən 3 komandaya universitetin müəllimi Fariz Həsənli mentorluq etmişdir.

Komandalar kompüter və mobil oyunların təhsilə inteqrasiyası haqqında 48 saat ərzində startup proqramları hazırlayıblar.

“Xəzər”in tələbələri Fərid Əliyev, Rəqsanə Şəkərova, Şərqiyyə Rəhimli (CodeCrypts komandası) qızıl medala, Leyla Abışlı, Lalə Məhərrəmova, Zeynal Mərdanlı (Reapers komandası) gümüş medala, Güllər Fərzəli, Mahir Cahangirov (BlackJack komandası) isə bürünc medala layiq görülüblər. Qızıl medalımız iki qızıldan daha yüksək ballı (first of first) olub.