Artıq üç ildir ki, Nailəxanım Fondu milli mənşubiyyətindən asılı olmayaraq Xəzər Universitetinin magistratura və doktorantura pilləsində təhsil almaq istəyən istedadlı xanım namizədlərə tam maliyyələşmə prinsipi ilə təqaüd proqramı təklif edir.

Qeyd edək ki, Nailəxanım Fondu “Dünya” məktəbinin və Xəzər Universitetinin həmtəsisçisi Nailəxanım İsayevanın xatirəsini əbədiləşdirmək məqsədilə yaradılan qeyri-kommersiya təşkilatıdır. Görkəmli pedaqoq Nailəxanım İsayeva yorulmaz fəaliyyəti ilə hər iki qurumun inkişafına töhfə verən tanınmış ziyalı olub və bu Fond da məhz onun elmə, təhsilə olan hədsiz diqqət və qayğısının bariz nümunəsidir.

Bu il noyabrın 24-də Nailəxanım təqaüdünün təqdimetmə mərasimi “Dünya” Məktəbinin “İnciçiçəyi” zalında keçirildi. Tədbirdə hər iki təhsil ocağının rəhbərliyi, dövlət qurumlarının nümayəndələri, Çin Xalq Respublikasının ölkəmizdəki səfiri xanım Qo Min və Səfirliyin siyasi şöbəsinin müdiri xanım Sü Tsin, eləcə də Meksikanın ölkəmizdəki səfiri xanım Maria Victoria Romero Caballero və digər qonaqlar iştirak edirdilər.

Xəzər Universitetinin kamera orkestri qonaqları möhtəşəm bir ifa ilə salamladı, sonra isə Azərbaycan Dövlət Himni səsləndirildi. Nailəxanım fondunun rəhbəri və Dünya məktəbinin direktoru Aygün Gardiner, millət vəkili Azay Quliyev, Meksikanın ölkəmizdəki səfiri xanım Maria Victoria Romero Caballero çıxış edərək, mərasimin əhəmiyyətindən danışdılar və builki qalib xanıma xoş arzularını ünvanladılar. “Dünya” məktəbi şagirdlərinin hazırladığı səhnəciklər və rəqslər, eləcə də Nailə İsayevanın həyat hekayəsi, pedaqoji fəaliyyətindən bəhs edən videoçarxlar qonaqlarda xoş ovqat yaratdı.

Mövzusu qadınların təhsil və cəmiyyətdə rolu olan panel müzakirədə şagirdlər maraqlı diskussiya nümayiş etdirdilər və bir çox aktual məsələləri qonaqların diqqətinə çatdıra bildilər. Ötənilki qaliblərinin iştirakı ilə hazırlanan və onların öz həyat hekayətlərini paylaşdıqları video görüntülər də nümayiş olunandan sonra bu il qalib adını qazanan Monireh Bahrami`yə Nailəxanım Fondunun və təhsil ocağının rəhbəri Aygün Gardiner tərəfindən sertifikat təqdim edildi. Monireh Bahrami də öz növbəsində Fondun rəhbərliyinə bu təşəbbüsə görə öz təşəkkürünü bildirdi və iştirakçılara özü haqda geniş məlumat verdi.

Mərasim Nailə xanım İsayevanın bəstələdiyi və şagirdlərin ifasında səslənən “Dünyam” mahnısı ilə sona yetdi.