2023-cü il oktyabrın 31-də Xəzər Universitetinin Karyera Mərkəzinin assistenti Mustafa Həsənli Bakı Ali Neft Məktəbində (BANM) keçirilən Karyera Mərkəzlərinin II Strateji İnkişaf Konfransında iştirak edib.

Konfransın ilk yarısı Məzunların Məşğulluq Reytinqi platformasının təqdimatı haqqında olub. Dövlət Məşğulluq Agentliyinin Əmək bazarının təhlili departamentinin şöbə müdiri Bəhman Hüseynli platforma haqqında geniş məlumat verib. Qeyd edib ki, platformanın əsas məqsədi ali məktəblərin əmək bazarı ilə mütəmadi əlaqəsini təmin etməkdir.

Dövlət Məşğulluq Agentliyinin Mərkəzi karyera filialının müdiri Toğrul Ələkbərov “Karyera mərkəzlərinin standartları”, “Karyera mərkəzləri hansı xidmətləri göstərməlidir?”, “Karyera mərkəzlərinin idarə olunması” mövzularında tövsiyələrini bildirib.

Elm və təhsil nazirinin müşaviri Nicat Məmmədli daim inkişaf edən əmək bazarına uyğunlaşma vasitəsi kimi məlumatların toplanmasının vacibliyini vurğulayıb.

Qonaq məruzəçi Umur Çalıkoğlu karyeranı təşkil edən dəyişkən paradiqmalara diqqət çəkərək, karyera mərkəzlərinin tələbələrin istiqamətləndirilrməsində mühüm rolundan bəhs edib.

ADA Universitetinin Karyera mərkəzinin meneceri Təranə Aslanova diqqəti sistematik fəaliyyət planlarına, süni intellektin inteqrasiyasına və qlobal korporasiyalarla tərəfdaşlıq əlaqələrinin gücləndirilməsinə yönəldib. Bu tədbirlər tələbələri rəqabətli iş bazarında uğur qazanmaq üçün tələb olunan əsas bacarıqlarla təchiz etməkdən üçün çox vacibdir.

Konfransda iş axtaranların potensial işəgötürənlərlə problemsiz əlaqəsini asanlaşdıran qabaqcıl texnologiya nümayiş etdirilib. Bu innovativ yanaşma tələbələr üçün iş axtarışı prosesini sadələşdirir, təhsildən peşəkar dünyaya keçidi daha səmərəli edir.

Konfrans ali təhsildə karyera mərkəzlərinin əhəmiyyətini və tələbələrin uğurlu gələcəklərinin formalaşmasında əvəzsiz rolunu bir daha nəzərə çatdırıb.