2023-cü il noyabrın 3-də Xəzər Universitetinin Nərimanov kampusunda Nəsiman Yaqublunun “Qərbi Azərbaycanlılar: Unudulmuş irs” kitabının təqdimatı keçirilib. Tədbirdə çıxış edən Prof. Nəsiman Yaqublu kitabın nəşrinə göstərilən dəstəyə görə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinə öz təşəkkürünü bildirib. Sonra o, Qərbi Azərbaycan bölgəsindən olan müəlliflər Əkbər ağa Şeyxülislamzadənin, Məmməd Sadıq Aranın, Tağı Aranın, akademik Heydər Hüseynovun oxuculara geniş məlum olmayan yaradıcılıq nümunələrinin bu kitabda toplanıldığını iştirakçıların diqqətinə çatdırıb.

Tədbirdə çıxış edən Xəzər Universitetinin müəllimi Bayram Quliyev də N.Yaqublunun son illərdə nəşr edilən kitablarının Azərbaycan tarixinin unudulmuş sahələrinin öyrənilməsi baxımından böyük əhəmiyyət kəsb etdiyini vurğulayıb.

Tədbirin sonunda iştirakçılara “Qərbi Azərbaycanlılar: Unudulmuş irs” kitabı paylanılıb.