İngilis dili və ədəbiyyatı departamentinin həyata keçirdiyi ümumi ingilis dili proqramı layihəsinə əsasən 2023-cü il sentyabrın 22-də Torpaqşünaslıq və Aqrokimya İnstitutu və Sukanal Elmi-Tədqiqat və Layihə İnstitutunun əməkdaşları üçün yekun dil səviyyə imtahanı təşkil edilmiş və imtahanı müvəffəqiyyətlə vermiş iştirakçılara sertifikat təqdim olunmuşdur.

Tədbirdə Torpaqşünaslıq və Aqrokimya İnstitutunun direktoru Əlövsət Quliyev və Sukanal Elmi-Tədqiqat və Layihə İnstitutunun direktoru Vüqar Mirzəyev iştirak etdilər. Onlar Xəzər Universitetinin İngilis dili və ədəbiyyatı departamentinin müdiri Milana Abbasova və universitetin layihə üzrə ingilis dili müəllimi Rəhimə Xəlilliyə layihənin həyata keçirilməsi ilə bağlı təşəkkürlərini bildirdilər.

Sonra layihənin davam etdirilməsi ilə bağlı müzakirələr aparıldı. Qeyd edək ki, hər iki institutun əməkdaşları "başlanğıc", "ilkin orta", və "orta" dil səviyyə qruplarını bitirmiş və müvafiq səviyyələrə uyğun sertifikatlar almışlar. Tezliklə layihəyə davam edərək, növbəti dil səviyyə qrupları təşkil olunacaq, dərs proqramına başlanılacaq.