Həyat elmləri departamentinin tədqiqatçıları Dos. Cavid Ocaqi, Dos. Səidə Şərifova və b.ü.f.d. Məhəmməd Eldarovun 2023-cü ildə İsveç Kənd Təsərrüfatı Elmləri İnstitutu ilə birgə hazırladıqları “SORG4NOBAL: Baltik dənizi regionunda evtrofikasiya və pestisidlərlə çirklənmənin azaldılması üçün iqlim dəyişilmələrinə davamlı sorqonun introduksiyası" (“SORG4NOBAL: Introduction of climate-resilient sorghum for the mitigation of eutrophication and pesticide pollution in the Baltic Sea region”) adlı beynəlxalq elmi-tədqiqat layihəsi İsveç Universiteti tərəfindən qalib elan olunmuş və maliyyələşdirilməsi qərarı verilmişdir.
Layihə işlərinin icrası ilə bağlı ilk birgə görüş 2023-cü il sentyabrın 5-7-də İsveçin Malmo şəhərində yerləşən İsveç Kənd Təsərrüfatı Elmləri İnstitutunda keçirilmişdir. Cavid Ocaqi və Səidə Şərifova həmin görüşdə iştirak etmiş, Xəzər Universiteti, layihənin Azərbaycan tərəfindən öhdəlikləri ilə bağlı məlumat verilmiş, müzakirələr aparılmışdır.
Üç gün davam edən görüşlərdə layihə iştirakçıları İsveç, Estoniya, Latviya və Ukraynadan olan mütəxəssislərlə yanaşı, İsveç, Danimarka və Niderland Krallığından tanınmış alimlər də iştirak etmiş, müxtəlif ölkələrin təcrübələri dinlənilmiş, gələcək planlar və birgə yeni layihələrin hazırlanması məsələləri müzakirə olunmuşdur.
Layihə ilə bağlı növbəti görüşlərin birinin Xəzər Universitetində keçirilməsi qərara alınmışdır.