Seriyanın “Qaçaq Həcər” adlı 5-ci kitabı Xəzər Universiteti Nəşriyyatında çapdan çıxmışdır. Kitabın müəllifi Təhminə Əsgərovadır.

Kitab xalq qəhrəmanı Qaçaq Nəbinin həyat yoldaşı və silahdaşı Həcər Xanalı qızına həsr olunmuşdur. “Aslanın erkəyi, dişisi olmaz” bölümündə müəllif iyirmi ildən artıq at belində qəhrəmanlıq səhifələri ilə dolu həyat yaşamış Həcərin adının igidlik və qorxmazlıq rəmzi kimi tarixə düşdüyünü nəzərə çatdırır.

Kitabın “Dastanlaşan ömür”, “Ədəbiyyat və incəsənətdə Nəbi-Həcər obrazı” bölümlərində Təhminə Əsgərova Nəbi və Həcər haqqında həm şifahi və bədii ədəbiyyatda, həm də aşıq yaradıcılığında, heykəltəraşlıqda yaradılmış çoxlu əsərlər, həmçinin sənədli və bədii filmlər haqqında ətraflı məlumat verir. Kitabda müvafiq fotoşəkillər də yer almışdır.