Türkiyənin Qazi Universitetinin nümayəndələri Fatma Nur Fişne və Derya Yüreğilli Göksü Erasmus+ İşçi Heyətinin Mübadilə Proqramı (Erasmus+ KA107171) çərçivəsində 2023-cü il mayın 30-dan iyunun 2-dək Xəzər Universitetində oldular. Səfərin ilk günü professorlar ilkin olaraq Beynəlxalq əlaqələr şöbəsi, sonra müvafiq olaraq İngilis dili və ədəbiyyat departamenti və Humanitar, təhsil və sosial elmlər fakültəsi tərəfindən qəbul edildilər.

Proqrama uyğun olaraq Kitabxana İnformasiya Mərkəzinin direktor müavini Aytac Misgərli qonaqları mərkəzin fəaliyyəti ilə tanış etdi. Nailəxanım Mədəniyyət Mərkəzində onlara görkəmli pedaqoq Nailəxanım İsayevanın həyat və fəaliyyətini əks etdirən eksponatlar haqqında ətraflı məlumat verildi. Sonra Fizika və elektronika departamentinin müdiri Fəridə Tatardar qonaqları departament və laboratoriyanın fəaliyyəti ilə tanış etdi. Sonra qonaqlar “Atəşgah məbədi” Dövlət Tarix-Memarlıq Qoruğunda ekskursiyada oldular.

Növbəti günlərdə Humanitar, təhsil və sosial elmlər fakültəsinin dekanı Elza Səmədova ilə görüş oldu və Derya Yüreğilli Göksü tərəfindən Xəzər Universitetinin əməkdaşları üçün “Layihə idarə edilməsi və təhsil elmləri” mövzusunda məlumat sessiyası keçirildi.

Proqramın sonunda nümayəndə heyətinə sertifikat və hədiyyə təqdim olundu.