Xəzər Universiteti Beynəlxalq əlaqələr ofisinin koordinatoru Arzu Bədəlova Erasmus+ İşçi Heyətinin Mübadiləsi (KA107) layihəsi çərçivəsində aprelin 24-28-də İspaniyanın Murcia şəhərində San Antoniya Katolik Universitetində səfərdə olub.

Səfərin ilk günü San Antoniya Universitetinin Beynəlxalq əlaqələr şöbəsi tərəfindən proqramda iştirak edən universitet nümayəndələrinin tanışlıq məqsədilə görüşü keçirilmiş və Murcia şəhərinin tarixi və mədəni abidələrinə ekskursiya təşkil olunmuşdur.

Növbəti iki gün ərzində iştirakçılar təmsil etdikləri universitetlər barədə təqdimatla çıxış etmişlər. Tədbirin son günü onlar San Antoniya Universitetinin Cartagena ərazisində yerləşən kampusunda olublar.

Arzu Bədəlova səfər çərçivəsində Xəzər Universitetinin Biznesin idarəçiliyi ixtisasının ikinci kurs tələbəsi Əzizə Mustafayeva ilə də görüşmüşdür. Qeyd edək ki, Əzizə Mustafayeva hazırda San Antoniya Katolik Universitetində yaz semestri ərzində Erasmus+ Tələbə Mübadiləsi Proqramı daxilində təhsil alır.

Qeyd edək ki, proqramda Xəzər Universiteti ilə bərabər Tbilisi Dövlət Universiteti, Krok Universiteti, İliya Dövlət Universiteti, Varşava Universiteti və s. universitet nümayəndələri iştirak etmişlər.